KRALENDIJK – E lancha Nabarima ku ta den golfo di Paria ta kousando tenshon pa islanan ABC. E lancha ta den problema i por kuminsá laga krudo bai, loke ta un problema serio. Havenmeester Gunther Flanigen, a konta di e situashon i algun senario.

“E lancha FSO Nabarima ta den problema i nos tin e situashon na bista ya pa algun siman. Ta trata di un lancha ku ta kargá ku petroli i e no por nabegá riba su mes. (otro barku mester rank’é). Debí ku ta trata di un barku di Merka den teritorio di Venezuela, ta pone (debí na nan problemanan ku otro) no por saka e petroli. Esaki ta e motibu ku poulatinamente e barku su estado debí na falta di mantenshon a kuminsá bai atras i a kèntel di banda. Esaki a hala basta atenshon riba tereno internashonal i Boneiru tambe a tuma nota di esei. Huntu ku Rijkswaterstaat na Hulanda, Boneiru ta atendé ku e situashon si resultá ku e lancha laga petroli bai riba laman i e yega kosta di Boneiru. Venezuela i Trinidat & Tobago ta kaminda ku promé e zeta ku sali for di e lancha ta yega.

E posibilidat pa e petroli yega den e área di Karibe ta posibel, sinembargo e lo por yega Boneiru, pero no asina desastroso. E lo ta algu similar di loke a yega Boneiru kaba algun aña pasa. No ta fásil wanta e bala nan di petroli ku lo por yega nos kosta. Esaki debí ku e bala di petroli ta poko bou di awa te na momentu e yega un kosta. Ta dura mas o ménos 2 pa 3 siman despues ku e lancha kuminsá basha petroli den laman, pa e yega den nos área.

Tin un plan di akshon. Pues e preparashon ya ta andando kon pa por atendé ku e situashon si esaki ta e kaso ku petroli yega nos isla i pa por tin sufisiente material pa hasi limpiesa. E lo ta un situashon fastioso, sinembargo nos ta purba pa hasi tur posibel pa atendé mihó posibel. Lac, Sorobon i Lagun tin prioridat si dado kaso e balanan di petroli alkansá nos kosta. Último informashon internashonal ku nos a tende di dje; tin un kompania ENI di Italia ku a yuda Venezuela pa stabilisá e lancha pa evitá problema ku e ta senk. Debí na e problema di e pandemia di Covid-19, ta hasi e parti organisatorio poko difísil, sinembargo tin palabrashon hasí, si Boneiru no por atendé ku e situashon tin un akuerdo di ayudo profeshonal for di Merka pa duna un man. Awor ta di warda i sigui monitòr e situashon i spera nada sosodé ku e lancha Nabarima”, havenmeester Gunther Flanigen a bisa.   

Share This
error: Content is protected !!