KRALENDIJK – “E asuntu di struktura estatal, UPB a trese esaki, i mi no ta bai menshoná tokante sentimentu miksto, pasobra pa ami e no ta eksistí!”, diputado Pablo James Kroon a bisa. “Tin kos ku mester drecha i e idea no ta pa bai bringa ku niun hende, sino huntu wak kon pa kana e kaminda pa atendé loke ta rekerí atenshon pa sea ehekutá òf mehorá nan. Nos ta atendiendo ku asuntu di kamindanan, e parti di edifisio di gobièrnu i e parti sosial.  Loke diputado Nina den Heyer ta atendé kuné, sigur e ta hasiendo un tremendo trabou. Ta bon pa nos pone poko mas spit, pa e proseso yega na formanan ku e hende por tin un mihó forma di biba. Pa loke ta trata e parti di kasnan di Fundashon Cas Boneriano, gobièrnu i Konseho Insular a duna tur nan parti pa e fondonan a bini liber, spesialmente pa e parti di infrastruktura pa kasnan di pueblo. Loke ta bai pone hopi atenshon na dje ta e parti di parselashon. Mester por yega na formanan ku por entrega un hende tereno mas rápido pa e por yega na un tereno pa e konstruí su kas. 

Pa loke ta trata e proyekto kaminda Broertje Janga ta importante pa desaroyá e área, sigur teniendo kuenta ku e pari di naturalesa. Konstruyendo kaminda Broertje Janga ta pone ku Playa i Rincon ta mas fásil pa yega di un pa otro. Ta importante pa krea oportunidat pa nos Boneriano na promé lugá den posishonnan klave. Si no tin hende pa okupá e funshon, mester guia nan pa medio di kurso, pa nan ta apto pa por hasi e trabou”, diputado Kroon a bisa.  

Share This
error: Content is protected !!