KRALENDIJK – Djadumingu mèrdia doño di un kas situá na Kaya Eagle den Playa Pabou a hañ’e ku problema despues ku nos isla a risibí dos dia tras di otro un pal’i awa. E habitantenan a splika Radio Live99.9 FM ku pa basta tempu nan tin problema ku awa ta drenta den nan kurá i asta drenta den nan kas i kousa daño na momentu ku tin yobida fuerte.

For di despues ku a konstruí un kompleho di apartamentu dilanti di nan kas, e problema a presentá. A traha e kompleho di apartamentu na haltu i tur e awa ta kore bin den nan kurá ku ta mas abou. A buska ayudo i pone e departamentu konserní di gobièrnu di Boneiru na altura di e situashon, pero nunka mas a tende òf hasi nada pa yega na un solushon.

Djadumingu mèrdia mester a yama kuerpo di bombero pa bin duna un man pa chupa e awa for di den e kurá ku a kuminsá drenta den e kas. Despues a pone saku di santu pa purba stòp e awa di pasa. Mas ku esei lo no por hasi pa e habitantenan. E habitantenan ta spera ku e departamentu konserní di gobièrnu ku ta na altura di e situashon ora di yobida, por mustra kara awor ku a bai Prensa.

Share This
error: Content is protected !!