KRALENDIJK – Gezaghèber Edison Rijna a papia siman pasá ku komunidat relashoná ku e situashon aktual di Coronavírùs (CoViD-19) na Boneiru.

“Ta bai bini mas pasahero for di Kòrsou i Hulanda. Dor di esaki e chèns pa kontaminashon for di afó ta krese. Pa esei tin ku mantené sierto medidanan. Pa e chèns pa hende lokal pega keda chikitu. Esaki por solamente si nos limitá nos kontaktonan ku otro. P’esei ta mihó i ta rekomendá, pa traha for di kas. Eventonan grandi pa públiko, na unda hende por pega otro, ainda no ta permití. Enkuentronan privá ku un máksimo di 10 persona presente ta pèrmití.

Ta posibel awor pa mas fásil un hende bini Boneiru. Pasaheronan for di Kòrsou, Canada i Hulanda (pues Europa) ta bonbiní na Boneiru. Tur hende ku kier bini Boneiru por yega for di un di e tres paisnan aki. For di e tres paisnan aki so por bini Boneiru i esaki ta pa regulá e kantidat di pasaheronan ku ta drenta. A traha afsprak ku e kompanianan di aviashon tokante esaki. Pasaheronan tin ku mustra ku nan a hasi e PCR tèst na un di e tres paisnan di orígen i ku esaki su resultado mester ta negativo. E pasaheronan mester a hasi e tèst mas tardá 72 ora promé nan subi avion ku ta hiba nan Boneiru. Sino e pasahero tin ku bai den karentena obligatorio pa 14 dia. Ta hasi un eksepshon solamente pa esnan di Boneiru ku tin ku bula bai Kòrsou i bini bèk riba mesun dia pa motibu di por ehèmpel negoshi, entiero òf kasamentu. Sí, nan tin ku pidi eksonerashon na repat@bonairegov.com. Bishitantenan for di Kòrsou ku ta bini Boneiru mester presentá un resultado negativo di un PCR tèst. Paga tinu: biahamentu tin su riesgo kuné. Ta abo ta karga e riesgo finansiero si bo keda kontagiá den eksterior i tèst positivo”, gezaghèber a bisa.    

Share This
error: Content is protected !!