Kralendijk – “Despues di dos siman i mei ku nos no tabatin kaso nobo di hende ku a pega ku e Coronavírùs(CoViD-19), siman pasá nos a haña tres kaso aserka ku a rekuperá kaba”, Dr. Marian Luinstra Passchier a bisa algun dia pasa durante un konferensia di prensa. “Ta trata di tres hende ku a bini for di Hulanda pa Boneiru. Tempu ku a suavisá e reglanan pa bini Boneiru, nos tabata sa ku ratu ratu hende ku CoViD-19 lo bini nos isla. Por ehèmpel hende for di Hulanda, Kòrsou òf otro lugá.  

Esei no ta problema, tan ten ku nos tin e vírùs bon kontrolá. Esei ta nèt loke a pasa e siman akí. Na momento ku tabata nesesario, nos a drenta mesora den akshon. E hendenan ku a pega ku e vírùs, a bai mesora den isolashon. Nan tabatin kontaktoku par di hende, e hendenan akí ta den karentena awor. E chèns ku e vírùs a plama ta masha chikitu.  

CoViD-19 ta keda pa basta tempu ainda serka nos. Loke ta importante ta pa nos siña biba ku e vírùs. Esei ta nifiká ku nos mester kontrolá e kasonan di hende ku ta pega ku e vírus. Nos ta hasi esei pa nos por sigui biba mas seif ku ta posibel. P’esei nos ta limitá e kantidat di hende ku tin mag di drenta Boneiru. Nos ta pidi nan pa yena un deklarashon di salú i pa nan hasi un PCR tèst pa mas trempan 72 ora promé ku nan buelo. Pa por bini Boneiru, resultado di e tèst mester ta negativo. E kompanianan di aviashon ta kontrolá esaki promé ku buelo sali.    

Ora e pasaheronan yega Boneiru, nos ta kontrolá esei un biaha mas. Asina nos ta hasi e chèns mas chikitu ku un hende ku a pega ku e vírùs ta bini Boneiru. E chèns ei no ta sero. Nos saku nos no por evitá shenporshento ku CoViD-19 ta yega nos isla. Despues ku hende yega Boneiru, por resultá ku nan a pega tòg ku e vírùs. Por ta ku ora di kontrolá, tin kos ku esun ku a kontrolá no a kai ariba.  

Ta p’esei ta masha importante pa tur hende tene nan mes na e reglanan básiko. Nos di nos banda ta investigá bon ta unda fuente di e vírus ta, i ku ken e hende ku a pega ku e vírùs tabatin kontakto. Si mester hende ta bai mesora den isolashon òf den karentena. Ku un aparato nobo pa hasi tèst, nos kapasidat di tèst a bira mas grandi. Awor nos ta haña resultado di tèst mas lihé. Asina nos ta tene e vírùs bou di kontròl.  

Huntu nos a mustra e luna nan ku ta tras di lomba ku nos por. Awor ta importante pa nos sigui hasi esei. Nos ta konta ku boso koperashon. Bo konosé hende ku a bini Boneiru? Òf bo tin hende di bishita ku a bin pa vakashon? Splika nan ki ta e reglanan ku ta konta na nos isla. Bisa nan ku nan por yama 0800-0800 si nan haña keho ku por tin di aber ku COVID diesnuebe. Bo konosé hende ku ta den isolashon òf den karentena? Yuda nan, pa nan pasa e temporada akí sin doló di kabes. Hasi kompra pa nan òf yama nan mas regular na telefòn. Wak sí pa bo no yega muchu serka di nan!  

Nos por sigui biba manera nos a kustumá mas tantu posibel, basta nos sigui kumpli ku e reglanan básiko manera:  

Sigui mantené distansia di un meter i mei di otro hende 

Bai kas mesora ora bo tin keho ku por tin di aber ku CoViD-19 i yama pa traha un sita pa tèst.   

Nos ta konta ku boso”, Dr. Marian Luinstra Passchier a bisa.

Share This
error: Content is protected !!