KRALENDIJK – Radio Live 99.9 FM djarason último a risibí un informashon di un situashon fastioso na skol Liseo Boneriano na kaya Amsterdam. E prome informashon risibí ta indiká ku tabatin un alumno hulandes oropeo ku tabata bende un supstansia prohibí riba tereno di e skol i ku te asta tin alumno ku mester a bira malu despues di a kumpra i kome esaki. Ta trata aki di un tipo di kuki/bolo brownie ku hash, mariwana, aden. E tabata bende esaki pa 10 dòler riba tereno di skol. Tin informashon ku asta tin un alumno ku lo mester a bira basta malu i mester a bai poli debí na intoksifikashon. Relashoná ku e informashon aki direktor di unidat di Liseo Boneriano a manda un karta pa mayornan i ta konfirmá e notisia.

”Djarason tras di lomba maneho di skol na Liseo Boneriano a tuma nota di supstansia prohibí na skol. A hasi un investigashon interno relashoná ku e asuntu. Den e investigashon, skol a tuma kontakto ku polis. Awor e kaso ta den man di polis i nan ta kontinuá ku e investigashon. Nos di Skol Liseo Boneriano ta deseá pa tur mayor ta na altura ku no ta tolerá tipo di kaso manera loke a sosodé. Ta estriktamente prohibí pa un hóben ku ta bishita e skol. Ta trata di supstansia peligroso ku tin efekto riba salu di hende. Esnan ku atendé ku e tipo di kosnan aki, ta haña ‘skorsing’ i kore riesgo serio pa nan estudio. Semper ta pone e kaso nan aki den man di polis pa kontinuá ku investigashon. Nos ta spera kada mayor ta papia ku nan yunan na kas i informá nan tokante e tipo di situashonnan menshoná. Esaki ta loke direktor di unidat di Liseo Boneriano, Barbara Sol, a skirbi den un karta pa mayornan ku tin yu ta bishitá e skol.

Share This
error: Content is protected !!