Kralendijk – Departamentu di Alfabetisashon di FORMA ta risibí fondonan di Cargill pa ehekutá proyektonan pa e grupo di analfabeta funshonal. Siman pasá Cargill a akordá un petishon di Fundashon FORMA pa finansiamentu di dos proyekto. E proyektonan lo kuminsá kana den luna di novèmber akí.

Un di e proyektonan ta enserá un kantidat di tablets pa asina FORMA por usa durante di diferente lès di alfabetisashon. Esaki nan ta entre otro abilidat digital, abilidat di skibi, i lesa i komprondé. Pa medio di e uso di tablets ta logra ku partisipantenan por praktiká den un ambiente sigur i haña mas konfiansa den e uso di aparatonan digital ku ta usando mas i mas den bida diario. Por ehèmpel na banko i otro kompanianan.

E otro proyekto ta enserá tayer i diferente programa di lès pa analfabeta funshonal. FORMA ta kuminsá duna lès na Rincon, dos biaha pa siman, di novèmber te ku promé di mei. Ta bai ofresé diferente programa di lès kaminda partisipantenan por praktiká ku diferente abilidat, manera: abilidat sosial, lesa, skibi, yena formulario, presupuesto/maneha sèn, abilidat digital.

17% di partisipantenan di alfabetisashon ta biba na Rincon. Transporte públiko for di Rincon pa Playa ta relativamente karu i e akseso no ta óptimo, bùsnan no ta kore regular. FORMA a trata diferente biaha pa kuminsá ku lèsnan di alfabetisashon na Rincon pero te ku awor esaki no tabata posibel. Ku e fondonan ku awor FORMA lo risibí di Cargill lo start un programa piloto te ku mei di 2021. Despues lo evaluá si ta posibel pa hinka esaki den e programa regular di FORMA.

Kursistanan di Rincon ku ta sigui un programa na FORMA den Playa, awor tambe por sigui lès den Rincon. Tur adulto ku no por lesa òf skibi sufisiente ta bonbiní pa sigui ku un di e programanan. Por yama na FORMA libramente pa apliká 717-6949. Si bo konosé un hende ku mester di un di e kursonan menshoná, motivá e persona pa pasa na FORMA. E kursonan akí ta kompletamente grátis.

Na radio i televishon FORMA lo duna informashon regularmente ora tin un tayer òf ta start ku un tópiko di lès nobo.

Investigashon (Stichting Lezen & Schrijven Bonaire, 2015) ta mustra ku ta importante pa tin kursonan di alfabetisashon pa adulto. FORMA ta sumamente kontentu ku por a haña fondonan di Cargill pa por kuminsá den Rincon i pa por amplia tambe ku otro

aparatonan digital, asina ta ofresé variashon pa e analfabeta funshonal. FORMA ta sigui pone atenshon na e grupo di adulto akí ku tambe ta konta den nos komunidat. Boneiru ta desaroyando, mas i mas ta puntra siudadanonan pa hasi uso di medionan digital, loke ta sumamente difísil si bo no por lesa i skibi sufisiente. Tambe pa adultonan ku a hasi un edukashon práktiko esaki ta keda difísil hopi biaha.

E difikultat di no por partisipá ku e desaroyonan ta oumentá e nivel di strès serka e adulto. Pues ta sumamente importante pa por ofresé kursonan di alfabetisashon.

‘Bo ke? Bo por! No duda!’

FORMA ta gradisí Cargill pa nan gran aporte na alfabetisashon Boneiru!

Pabien Rincon!

Share This
error: Content is protected !!