KRALENDIJK – E siman aki a tene un enkuentro ku prensa, kaminda a papia tokante e situashon di hopi famia ku problema pa paga hür di kas. Tin ayudo finansiero pa famianan ku ta den problema awor ku e areglo di ‘Yudami’ a kaba. Durante e konferensia a splika kua ayudo tin komo alternativa.

Diputado Nina den Heyer tabata presente i el a elaborá tokante kon e hendenan ta eksperensia e situashon di pandemia di Coronavírùs. Nan komo gobièrnu ta yuda esnan den nesesidat, diputado den Heyer a bisa.
Trusella Martis, trahadó sosial na direktorado komunidat i kuido a menshoná ku nan ta habri atrobe pa yuda esnan ku ta rekerí atenshon. “Nos servisio ta; si un hende ku no por paga koriente, hür di kas, Internèt, nos por yuda. Ta wak diferente aspekto relashoná ku su situashon finansiero i yuda nan. Tambe nos ta atendé ku servisio pa kuminda i a parti di krèsh. Nos ke yuda tur hende ku mester un ayudo. Presentá ku e dokumentunan nesesario pa nos por atendé pa por yudabo”, Trusella Martis a bisa.

“Gobièrnu ta deseá pa yuda, sinembargo no tur biaha ta ku sèn. Esaki ta loke Yona Chirino Felida, kende ta splika tokante e ayudo di gobièrnu. “Loke nos ta hasi pa yuda e hende, ta den forma di un guia pa kon e tin ku atendé ku sèn. E asuntu di hürmentu di kas ta di atenshon. Hopi tiki hende a hasi petishon pa haña ayudo di gobièrnu. Tin hende ku tabata den problema i no tabata paga kas promé ku e problema di Coronavírùs a presentá. Tin grupo di hende ku mester di guia pa sali for di nan problema. E persona ku ta deseá pa ayudo, por tuma kontakto ku nos ta number di telefon 777-4141. Pa medio di e number aki, por risibí splikashon di loke nos por yuda un hende den nesesidat”, Yona Chirino Felida a bisa.

Arelys Francees, Mènedjer di departamentu asuntu nan pa kas di Fundashon Kas Boneriano a bisa:”No sinta warda te na momentu tur kos pega.” El a duna un splikashon, tokante e proseso kon nan ta duna deskuento, pa yuda esnan den nesesidat pa nan paga ménos. Por pasa na nos ofisina pa yena formulario i ta atendé pa e persona bin na remarke pa deskuento di hür, Arelys Francees a bisa.

“No ta saka niun hende for di kas e temporada di krísis.” Esaki Ben Oleana, di Fundashon Kas Boneriano a bisa. “Nos tei pa yuda tur hende den e situashon aktual. Sí mester bisa, ku tin bista riba esnan ku no tabata paga kas for di promé ku situashon di Coronavírùs a presentá na Boneiru. Sakamentu di hende for di kas no ta un solushon. Mester guianan den futuro, esaki pa esnan ku no a paga for di promé ku Coronavírùs a presentá riba nos isla. Despues di tempu nan ta bai kore riesgo grandi pa pèrdè nan kas ku nan ta bida aden, ku ta di Fundashon Kas Boneriano. Ta duna e hende tempu pa huntu ku gobièrnu di Boneiru, deliberá kon pa yega na solushon promé yega asina leu pa bai korte ku un persona”, Ben Oleana a bisa.

Share This
error: Content is protected !!