KRALENDIJK – Suidadano S.T. ta kue kabritu di mondi (sin marka), i a resultá den man di polis i a sinta un kastigu di 7 dia den prizòn.  

S.T. a konta Radio Live 99.9 FM tokante loke a sosodé kuné algun dia pasa. “10 novèmber polis a informá den un komunikado ku a gara S.T. hòrtando kabritu. Esaki no ta bèrdat. Dia 5 di novèmber ami i un amigu a bai kue kabritu den mondi, sin marka, pues kabritu di mondi. Nos a topa 3 kabritu leu for di kunuku di hende i a gara nan. Nos a bai kas ku nan i e siguiente dia tabata planiá pa bai ku nan kunuku pa mata i kome nan.  

Djabièrnè mainta mi amigu a bèl mi bisami pa trese sèn ku mi mester a duna. El a bisami ku nan tin poko problema na kas. Mi a bai na kas di e amigu i momentu ku mi tabata yegando aya, mi a tuma nota ku tin polis na e kas. Momentu ku mi a yega na e kas, e polisnan a bisami; nan ta presente pa atendé tokante hòrtamentu di kabritu. Mi a bisa e polisnan ku e kabritunan ta pèrtenesé na nos, esta ami i mi amigu ku ta biba na e kas.

Nan a bisami; no tin mag di kue e kabritunan den mondi. Un polis mas a presentá na e sitio i nan a disidí pa arestámi. Mi a keda straño pasobra nan ta detenémi sin ku ami a hòrta kos di hende. Nan a bai warda di polis ku mi i aya den sèl, nan a puntrami loke a sosodé. Mi a konta nan tur kos ku a pasa relashoná ku kuementu di e kabritunan. E momentu ei nan a bisa mi ku un lei a pasa, i tur kabritu di mondi ta pertenesé na gobièrnu.

E momentu ei mi a puntra; dikon e kabritunan ta pèrtenesé na gobièrnu i nos no por mishi ku nan? Dikon no por kue kabritu di mondi i yuana si? Nan a bisami; no mag kue yuana, kiwa i koncha entre otro. E ta sosodé i no ta aktua ku esnan ku ta kue yuana koncha i kiwa, sinembargo e lei ya tei, polis a bisa. Nan a hibami prizòn i mi a papia ku mi abogado i el a bisami; e tampoko no ta di akuerdo ku kabritunan di mondi ta di gobièrnu. E lei tei i nos mester tene nos mes na dje.

Mi a keda 7 dia den prizòn. Mi pregunta ta; dikon no por kue kabritu di mondi? Dikon no ta sera un persona momentu ku e kue yuana den mondi? E otro pregunta ta meskos e asuntu di buriku ku ta un molèster den sierto sentido pa komunidat. Kisas ta bon pa pone esei tambe komo bestia di gobièrnu i nan ta responsabel pa loke nan kometé. Mi no ta di akuerdo ku e lei. Por komprondé ku e ta eksistí ya pa hopi aña. Segun ami; mester ahustá e lei den e tempu moderno. Dikon no por kue kabritu ku ta pèrtenesé na mondi? Stinapa ta tira nan mata, i dikon esei si ta posibel?

Polis a manda un relato inkorekto di mi persona den prensa, loke no ta bèrdat. Polis no a garami momentu ku mi tabata kue e kabritunan den mondi”, suidadano S.T. a bisa. 

Share This
error: Content is protected !!