KRALENDIJK – “Men On the Move” ta yama pabien awe na tur hende hòmber riba nan dia.

E aña aki na nivel internashonal ta pone atenshon na tres tópiko. E promé ta pa hasi diferensia positivo den bienestar i bida di mucha hòmber i e hòmber adulto. Na di dos lugá: konsientisá i promové i stimulá kreashon di gruponan i rekoudá fondo pa sostené bienestar di mucha hòmber i hòmber adulto. Por último promové diálogo positivo tokante hòmber i maskulinidat.

“Men On the Move” ta un grupo di sosten ku ta konvensí ku na Boneiru tambe nos mester para ketu i sostené entre otro mayor(nan) pa atendé ku sosialisashon i formashon di yu hòmber, transishon di mucha hòmber pa hòmber i preparashon di mucha hòmber pa e efekto di e preshon i eksigensia ku sosiedat ta pone riba e ròl di hòmber.

Intenshon di “Men on the Move” ta pa stimulá desaroyo físiko i mental salú.Tambe ta resaltá importansia di salú físiko i mental i maskulinidat positivo. Esaki den formanan kreativo, sosteniendo gruponan deportivo i organisando kompetensia sano entre hende hòmber. Banda di esaki lo duna informashon i guia sosial spesial pa e hende hòmber pa e por atendé ku entre otro derechi di tata pa por tin kontakto ku su yu, establesé paternidat, atendé ku violensia o abuso doméstiko di parti di e hende muhé kontra e hende hòmber, anda ku embaraso no deseá, malesa venériko, komportashon konfliktivo, homoseksualidat i igualdat di género. Meta prinsipal di e proyekto ta empoderashon di e hende hòmber.

“Men On the Move” tin espasio pa mas hende hòmber forma parti di e grupo. E grupo aki tin e tarea pa trese dilanti na un forma konkreto, kla i direkto e nesesidatnan di e hende hòmber i ku e sosten sosial ku e hende hòmber tin mester. Di e manera aki ta kontribuí na yudansa i guia sosial na midí i dirigí na hende hòmber.

Na e momentunan aki “Men on the Move” ta konsistí di señora Sharine Dorand, kordinadó di prevenshon pa Sentro Hubentut i Famia, i señornan Senders Giterson, Chon Theodora, Siegfried Hazel i John Soliano.

Sentro hubentut i famia ta felisitá Selibon p’e echo ku a pone atenshon spesial na su trahadónan maskulino den kuadro di dia di hende hòmber. A la bes na nòmber di “MpowerMen Curaçao” nos ta invitá hende hòmbernan pa un evento online grátis,

Dia: 19 di novèmber 2020

Ora: 7or pa 8:30 Anochi.

Tópiko: E muhé/e bida familiar vs Felisidat!

Pa partisipá mester registrá delantá i lo bo risibí e link. Pa mas informashon chèk Facebook Page “Fathers of Curaçao” pa e link òf manda un email na info@gwenleuteria.com.

Share This
error: Content is protected !!