KRALENDIJK – Fundashon Kuchara den kuadro di dia internashonal di mucha ta para ketu na e derechonan di e mucha ankrá den e tratado internashonal di Nashonnan Uní. Fundashon Kuchara su punto di salida ta salvaguardiá derechonan di e mucha. FK ta para ketu n’e nesesidatnan básiko ku mester ta presente pa e mucha por siña i desaroyá na un manera optimal. E mucha mester por sinti su mes liber di opstákulo ku ta impedí su desaroyo p’asina e por tin konfiansa i balor propio. Tambe un imagen propio, stábil i saludabel. E mucha mester por hasi eskoho i tuma inisiativa. E mucha su ambiente mester inspirá konfiansa. E enfoke di FK ta pa yuda i sostené e diferente kondishonnan pa un bon desaroyo den un ambiente agradabel, sigur i strukturá den kua e mucha ta sinti su mes protehá. E ambiente mester por ofresé kuido adekuá i kontinuo, edukashon na midí, konsumo saludabel, tambe espasio pa rekreá den tempu liber i oportunidat pa desaroyá talento. Tur esakinan ta hopi importante pa e mucha por presta i gosa di un bida agradabel i eksitoso.Adultonan entre otro mayornan ku tin e promé responsabilidat tin e papel esensial den e proseso di desaroyo di e mucha.FK su lema ta: TUR MUCHA TA KONTA. Si, e mucha ku falta atenshon i afekshon. E mucha lubidá ku ke presta. E mucha ku su nesesidatnan spesífiko ku ta deseá un oportunidat pa haña akseptashon, atenshon i guia. Si tur ta konta pa por logra lo máksimo di nan potensial pa nan tambe por duna nan aporte n’e komunidat boneriano.Dia internashonal di mucha tin ku sirbi tambe komo un dia di reflekshon pa para ketu na kon nos por brinda e mucha sosten i stimulashon den un ambiente kaminda ku su partisipashon mester ta na promé lugá.

Share This
error: Content is protected !!