KRALENDIJK – Den kuadro di klousurá di aña litúrgiko, Pader Santiago, vikario di Boneiru, kier invitá pueblo henter bin selebrá fiesta di Kristu Rei. Esaki ta tuma lugá riba djadumingu awó dia 22 di novèmber un homenahe na Kristu Rei di universo. Esaki ta un di e fiestanan importante den kalendario litúrgiko, pasombra ta selebrá, ku Kristu ta e Rei di universo. Su Reino ta un Reino di bèrdat i di bida, di santidat i di grasia. Durante di e fiesta aki ta rekonosé públikamente i ku balentía ku Hesus ta Rei, ku E ta sentro di universo, di historia, ku E ta prinsipio i fin (Mateo 25:31-46).

Nos ta selebrá den e fiesta aki ku Kristu por kuminsá reina den nos kada unu su bida. Kristu kier reina den nos gobernantenan, den nos mayornan i den nos lidernan. Kristu kier reina den nos pais. Ma nos mester habri p’ E nos kurason, i entreg’É nos kada un su bida pa nos ser guiá, kompañá i fortifiká ku Su Santu Spiritu. Pa asina nos tur sea Kristu su instrumento di miserikòrdia. Laga nos ban para ketu un ratu i huntu pidi Kristu Hesus: “reina den mi Señor, reina den nos mente, den nos kurason, reina den nos boluntat, pa Bo Reinado trese pas, harmonia, union, progreso kaminda humildat, sensibilidat ta instrumentonan pa nos atendé un pa ku otro.

Vikario di Boneiru, pader Santiago, ta invitá pueblo di Boneiru pa bin selebrá Kristu Rei djadumingu awó, ku ta tuma lugá na kada parokia, durante di Santa Eukaristia, na orarionan normal di djadumingu di kada parokia.

Share This
error: Content is protected !!