KRALENDIJK – Segun miembro di Konseho Insular pa Partido Demokrat, señora Rolanda Hellburg-Makaai, e presupuesto di 2021 presentá pa Kolegio Ehekutivo ta hopi mediokre i ta reflehá e falta di interes pa ku nos pueblo.

Despues di a sinta kasi dos dia largu pa atendé e presupuesto di 2021 mi a konstatá ku den e diferente áreanan, entre otro deporte, nos kareteranan, kombatimentu di pobresa, atenshon pa nos grandinan i bibienda nos por mira ku tiki atenshon a keda duná na esakinan di parti di nos gobièrnu.

Deporte en general ta kompletamente deskuidá. Nos kanchanan di deporte mayoria ta den un kondishon deplorabel nunka bisto aki na Boneiru i nos no ta mira ku lo bin un mehoransa tampoko, paso esaki no ta reflehá den e presupuesto di 2021.

Meskos ku tur hende ami tambe ta mira i sa ku nos kareteranan ta den un situashon super deplorabel. Tur kamindanan tantu di asfalt, betòn i di tera ta den un kondishon pésimo. Diputado Tjin Asjoe ku a kore pa su responsabilidat a primintí for di dia ku ela sinta komo diputado ku asfalt ta bai kore AWOR SI na Boneiru, ku deporte ta bai konosé su mihó tempunan i asina mi por sigui menshoná yen primintimentu sin base, puru puru “luchtkasteel”. A krea perspektivanan falsu den e pueblo ku engaño. Te ku awe loke nos por mira ta nada mas ku mas buraku riba nos kareteranan, i pa deporte i e otro áreanan niun dollar èkstra kontrario a kita pa pone pa paga kompinchinan fabor polítiko. Nos no ta mira den e presupuesto di 2021 ku e gobièrnu aki di UPB/MPB ta hasi ahustenan pisá pa drecha nos kareteranan, kaminda nos mes lo por hasié tiki tiki pero sigur, pero NO ta warda riba Hulanda manera ta e kustumber di e gobièrnu aki. Di e otro áreanan no papia mes, ku pa traha un simpel slipway no tin presupuesto.

Pa loke ta kombatimentu di pobresa nos mester bisa ku akinan tambe ningun ahuste a keda hasí di forma signifikativo pa kombatí pobresa na Boneiru. Ku despues di Covid-19 e sifranan a subi sigur.

Mientrastantu riba e presupuesto ta destiná sèn pa karnaval siendo ku gobièrnu mes a bisa ku pa motibu di Covid-19 lo no ta bai tin karnaval pa aña 2021.

Pa loke ta bibienda pa un kantidat grandi di siudadano ku ta den nesesidat di un dak riba nan kabes, nos mester bisa ku nada no a keda hasí pa bini ku plannan di parselashon nobo pa duna e siudadano un pida tereno pa e traha su mes kas pa e tin un dak riba su kabes. Un desaster total e presupuesto pa aña 2021 ku e gobièrnu aki di UPB/MPB a presentá na Konseho Insular, di e forma aki ta imposibel pa goberná e isla di Boneiru di un manera digno manera su habitantenan meresé.

Un desaster total e presupuesto pa aña 2021 ku e gobièrnu aki di UPB/MPB a presentá na Konseho Insular, di e forma aki ta imposibel pa goberná e isla di Boneiru di un manera digno manera su habitantenan meresé.

Tanten no tin sèn pa nesesidatnan di Pueblo, ta fiesta ku $400 mil pa fantasma di Masterplan,

$400 mil pa ‘kordinadó di karetera’, $400 mil pa kompania kompinchi pa ‘drecha finansa’! ESAKINAN TA E KOSNAN NOBO?

Finalmente señora Rolanda Hellburg-Makaai a bisa ku e gobièrnu aki a demonstrá un biaha mas pa medio di e presupuesto 2021 ku a keda presentá den Konseho Insular ku nan no ta kapas pa goberná nos dushi isla di Boneiru.

Share This
error: Content is protected !!