KRALENDIJK – Djasabra 5 di desèmber un grupo di mayor di hóbennan ku ta praktiká tènis, a tuma inisiativa pa organisá un torneo di tènis hubenil. E inisiativa di e grupo di mayor ta bini, debí ku na Boneiru e asosiashon di tènis ta inaktivo, ya pa hopi aña. E organisadónan a haña sosten di komersiantenan lokal, ku a aportá pa e torneo tabata un realidat i éksito.  

E torneo tabata pa kategoria di U12 mucha muhé i mucha hòmber i kategoria miksto. Un total di 12 mucha a partisipá, di kua 8 mucha muhé i 4 mucha hòmber. Debí na áwaseru ku a kai riba e dia, e final di U12 tantu di mucha hòmber, komo mucha muhé, a tuma lugá riba djadumingu parti di mainta. Den e kategoria di hóben U12; Kayden Domacassé a sali kampion i Izahyr Lacle  supkampion ku skor 6-1 / 6-0. Na e kategoria di Girls U12, Xaquenne Saragoza a sali kampion i Isabel Arango supkampion ku skor di 7-6 / 6-1. Pa e kategoria Mix stage 1, Jayden Arrindell a sali kampion i Sara Garcia supkampion ku skor 6-1. E grupo di mayor ta hopi kontentu kon tur kos a kana durante e fin di siman. Palabra di gradisimentu ta bai na tur ku a koperá pa e torneo tabata unu eksitoso. E torneo a tuma lugá na e kancha pega ku Eddy’s Restaurant, kendenan a pone e kancha disponibel pa e torneo.  

Share This
error: Content is protected !!