KRALENDIJK – E kaminda den Hanchi Amboina ta parsialmente será i a inisiá ku trabou pa koba un parti di e kaya pa pone asfalt na e sitio. Ta un área ku tabatin hopi outomobilista prekupá ku e situashon di burakunan. Diferente persona a kap tayer i kibra kos bou di nan outo riba e kaminda, debí na tantísimo buraku ku tabatin na sierto parti di e kaya. Hopi tabata e gritunan, ku porfin a hala atenshon di esnan konserní i trabou pa drecha e kaminda a kuminsa awe djarason mainta. Radio Live 99.9 FM a papia ku Martijn Zwiers di BWM, kendenan ta hasi e trabou pa drecha e kaminda, ku lo bai purba kaba e trabou pa djabièrnè awor pa outo por pasa, usando e parti nobo di e kaya. Si dado kaso no logra, lo sigui traha otro siman tambe riba esaki. Ta bai koba e fundeshi, yen’é i hasi tur esfuerso pa tèrminá e kaminda rápido. Kisas no den su totalidat, sinembargo si ku outo por pasa riba e kaminda i na luna di yanüari 2021 ta finalis’é, Zwiers a bisa. Esaki ta un tarea di urgensia i di último ora ku BWM a haña serka gobièrnu pa tèrminá den un par di dia pero naturalmente lo hasi un trabou di kalidat. Ta supliká outomobilistanan pa por fabor hasi uso di e desviashon indiká ku bòrchi.

Tin diferente otro kaminda ku ta rekerí atenshon kasi similar ku esaki, sinembargo mester kuminsá un kaminda pa por yega na e otronan. Potrèt ta ilustrá momentu ku trabou nan a kuminsá awe mainta.  

Share This
error: Content is protected !!