KRALENDIJK – Apesar di e situashon di Coronavírùs, e agrupashon musikal nobo ku ainda no a presentá den publisidat na Boneiru, a hasi su promé grabashon di ‘video clip’ ayera. Radio Live99.9 FM a logra penetrá i yega na e informashon na unda e grabashon tabata tumando lugá i a yega di sorpresa na e sitio. E banda ta enkabesá pa Philip Bernabela i Robert Felida i tras di kortina e maestro Dwight Leoneta i guiá pa Jairo Evertz, ta áktivo den silensio. E grupo no a sali den publisidat, sinembargo si nan ta den ful treinen. Nan proseso pa presentá den públiko a stanka debí na e pandemia di Coronavírùs. Den ‘front’ e banda tin Gerald Alberto, Semi Marten i Luiginio Molina. Hopi komentario ta sirkulá riba kaya tokante e agrupashon musikal, ku ta pendiente pa debutá. E nòmber úniko ku e agrupashon musikal aki tin tambe ta na disposishon di Radio Live 99.9 FM pero ta wanta esaki algun dia mas promé ku divulgé. Pronto nan ta estrená nan promé piesa riba merkado ku porsierto ta un tremendo piesa ku lo bai kai na agrado di un i tur, kompañá pa nan videoclip miéntras nan ta pendiente pa tempu drecha, pa nan por presentá den públiko i laga tur hende sera konosí ku nan.    

Share This
error: Content is protected !!