KRALENDIJK – Arthur Sealy ta bisa den un komunikado e siman aki ku for di mart pueblo di Bonaire ta konfrontá ku medidanan di urgensia pa evitá ku Covid-19 ta plama. Tur informashon di gobièrnu ta basá riba kon pueblo mester komportá i ta buska e balanse entre salubridat i ekonomia. Medidanan ku ta frena libertat di pueblo, pero ku bon komunikashon ku pueblo di Bonaire ta bira un isla ku e bon ehèmpel pa otro islanan den Reino. Reglanan aseptá ku ta yuda ta: tene distansia di 1 meter i mei, laba man ku habon, nister den kokoti man i no aglomerá. Sugerensia drumi na un ora kristian, hasi ehersisio, por ehèmpel kana, kome fruta i berdura, tuma vitamina C ku tin den lamunchi i apelsina, vitamina D nos ta haña for di solo. Bonaire ta riku na solo.

Awor ku kasimente tur hende na Bonaire ta usa tapaboka ta bon pa, a base di literatura sientífiko, wak kon i na ki momentu ta apropiá pa usa un tapaboka. Tin algun punto pa tene kuenta kuné a base di estudio ora usa tapaboka. No por usa un tapaboka dos trese dia pa motibu ku e ta a-higiéniko, e ta stroba den halamentu di rosea, bo no ta haña sufisiente oksígeno den bo pulmon ku por kousa ku sanger ta koha den e pulmon, pa personan ku malesa króniko e ta dañino pa nan kondishon, e tapaboka traha na kas no ta yuda, puntra un dòkter ki influensia un tapaboka tin riba struktura di e parti paden di un hende su boka ku tin asta konsekuensia pa su karni di djente, korokoro i tripa. Uso di labamentu di man ku produkto ku alkohòl kon ku para keda tin influensia riba bo kueru di man i tambe ta dañino.

Mirando ku ta bai kuminsá bakuná na Hulanda ta tempu pa kuminsá duna informashon tokante asuntu di bakuna. Kon seif e bakuna ta, kua ta e posibel efektonan, ki temporada ta kuminsá na Bonaire. E siman aki temporada di misa di ourora ta kuminsá, mi ta spera ku pastornan a tuma medida pa misa no bira e foko di Covid-19. Den fin di aña tur hende ke gosa. Un petishon na kompanianan; legumai asuntu di pagara, duna maske ta e aña aki e suma ei na banko di kuminda. Si e kantidat di kasonan positivo ta subiendo den luna di desèmber ta lógiko ku den yanüari e ta hopi mas. Kuidou ku nos ta sera aña usando e ekspreshon: Ta un biaha bo ta biba”.

Share This
error: Content is protected !!