KRALENDIJK – Promé Minister Mark Rutte a informá djamars anochi (ora di Hulanda) durante un debate di Tweede Kamer ku Boneiru i Aruba ta bai bira kódigo oraño. Pues tantu Aruba i Boneiru no ta isla rekomendá pa bishitá komo turista. E Minister Presidente di Hulanda ta menshoná ku ta rekomendá solamente pa biaha pa e islanan menshoná, si ta trata di un biahe nesesario. No ta rekomendá pa biaha pa algun dia di plaser. E kódigo pa e islanan ainda ta hel i entrante djarason 16 di desèmber esaki lo bira oraño. No ta konosí kuantu tempu esaki ta keda na vigor.

E medida èkstra no ta debí ku na Boneiru i Aruba tin hopi kaso di hende infektá ku CoViD-19. E problema ta ku na Hulanda tin un problema grandi ku hopi hende infektá ku e vírùs menshoná i konosí. “No ta sin motibu a duna e informashon i rekomendashon pa no biaha pa e islanan Aruba i Boneiru. Si bo hasié, bo ta un persona asosial. Mi no ta mira un motibu pa pone un regla awor pa un hende no por biaha. Esei ta algu hopi fuerte pa e hende. E tin konsekuensia tambe pa loke ta trata e parti di karga. Ta na kada persona pa mantené nan mes na e regla, pa evitá ku CoViD-19, ta sigui plama entre otro na Hulanda”, Promé Minister di Hulanda Mark Rutte a bisa durante un debate den Tweede Kamer kaminda el a papia di e medidanan pa ku corona vírùs.  

       

Share This
error: Content is protected !!