KRALENDIJK – Marian Luinstra-Passchier a papia na Radio Live 99.9 FM tokante e situashon último pa loke ta trata e pandemia di Coronavírùs i e bakuna. “Te awor Boneiru tin 6 hende infektá ku e vírùs. Tur dia ta tèst hende i e tenshon tei, si ta topa ku mas hende infektá. Pa awor e situashon ta bou di kontròl. Siman pasa a haña algun hende ku a tèst positivo, kendenan tabatin bishitante ku a bini for di Kòrsou. Hopi di e hendenan infektá, ta trata di hende ku a pega ku e vírùs trabou òf ambiente priva na kas. Esei ta e forma ku hendenan ta keda mas tantu infektá ku Coronavírùs. Ta importante pa tene e parti di distansha. Esei ta yuda sigur. No partisipá na fiesta. Bo ta gosa di e fiesta i loke nos ta yama; saka raton (afterparty, no ta dushi, esta bo a pega ku e vírùs durante fiesta.    

BAKUNA PA CORONA VIRUS PA BONEIRU 

Nos tin algun luna ya ta den e kòmbersashonnan ku Hulanda i ta preparando tur kos pa momentu ku e bakuna yega Boneiru, por atendé kuné na un manera korekto. Nos ta forma parti di Hulanda, pues na momentu ku Hulanda kuminsá hasi uso di e bakuna ku ta kontra Coronavírùs, despues di poko Boneiru tambe ta disponé di dje. Promé bia den historia, mundu a presentá un vírùs ku a pone tur parti di mundu para ketu un ratu. Pues a krea diferente bakuna den un tempu rápido i ta hopi kompania a hinka tempu i hasiendo uso di teknologia moderno pa desaroyá un bakuna. Hopi mas rápido ku nunka ántes. Algun luna pasa a hasi tèst riba un grupo chikitu di hende i asina a sigui amplia. Hopi sientífiko tin atenshon fuerte riba e bakuna, pa e ta kura e hende di e vírùs ya konosí, sin hasi daño na e ser humano. Mester ta un bakuna ku ta igual na esun ku mucha chikitu ta haña, momentu e ta beibi i ta konfiabel. Probablemente ta trata di un bakuna ku mester pasa un hende 2 bia. Pues ta un proseso e ta pa e hende por ta salba i protehá di Coronavírùs. Tin 2 bakuna ku ta relativamente konfiabel i ta funshoná práktikamente  korektamente.  

PROMÉ HENDENAN KU TA BIN NA REMARKE PA E BAKUNA 

Promé hendenan ku ta bin na remarke pa haña e bakuna ta esnan di edat avansá (60 pa ariba), i esnan ku tin problema ku salú. Tambe ta importante pa enfermeranan ku ta diariamente atendé ku hende enfermo i por pasa e vírùs pa un otro hende. No ta trata di un bakuna ku ta obligatorio pa tur hende, sinembargo kòrda si riba esnan rondó di bo ku si bo no tin e bakuna den bo sistema, otronan por keda destrosá ku e vírùs, pa bo motibu. Ta hopi importante pa prepará bon i tambe tin personal pa atendé ku e bakuna. Ta rekerí pa e proseso kana di un manera seif i sigur pa no krea mas problema na lugá di solushoná e situashon relashoná ku e vírùs. Nos ta konta ku momentu Hulanda tin e bakuna nos ta hañ’é rápido serka nan pa kuminsá ku e tratamentu na Boneiru”, DR Marian Luinstra  Passchier.  

Share This
error: Content is protected !!