KRALENDIJK – Segun dr. Willem Cecilia, e por por a tuma nota ku den e matutino Extra-Boneriano e prensá akreditá a risibí karnèt di prensa. Na interés di e mehorashon di trabou periodistanan na Hulanda Karibense ta emití karnèt di prensa na medionan ku ta kumpli ku kriterionan di akreditashon. Pa selektá ken ta bini na remarke pa akreditashon, e servisio di Reino Caribe Hulandes a establesé un komishon di evaluashon independiente ku tabata na enkargo di evaluá i asigná e akreditashon.

Mesún informashon ku a sali na hulandes tambe a sali na papiamentu i e original pues ta prosedente di e servisio di Reino Caribe Hulandes. Esaki a buta ku mi a puntra mi mes ta kiku ta e reglanan ku un periodista òf e representante di e media ‘online’ mester kumpli kuné pa haña akreditashon. Banda di esei akreditashon simplemente nifiká ku e periodista òf e media ‘online’ tin akseso na informashon i evenementonan ku e servisio di Reino Caribe Hulandes ta organisá. Akreditashon tin simplemente komo meta pa hasi reportahe periodístiko posibel. E servisio di Reino Caribe Hulandes tin tur derecho pa introdusí akreditashon pa prensa pero e mester ta mas transparente den esaki. Mehorashon di trabou periodista na Hulanda Karibense no por tin un korelashon pa akreditashon.

No ta informá ta ken a bin na remarke pa akreditashon tampoko. Si nos tuma nota di e maneho pa akreditashon di e Parlamento di Hulanda, e asina yamá ‘Tweede Kamer’, nos por saka afó ku esunnan ku por drenta Tweede Kamer pa kubri kualke eventualidat, mester tin periodismo komo su trabou prinsipal i mester prueba esaki dor di un deklarashon di su doño di trabou òf esun ku a duné e enkargo. Tambe ta sali for di punto di bista ku un periodista ta hasi su trabou ku ta redakshonalmente independiente i ta evitá mas tantu posibel e aparensia di konflikto di interes. Esaki ta konta pa Boneiru tambe? Tin espasio pa e asina yamá periodistanan ‘freelance’ haña akreditashon?

Un otro punto interesante ta e hecho ku e servisio di Reino Caribe Hulandes tin su mes servisio di informashon ku ta funshoná na satisfakshon. Mi ta asumí ku tur komunikado i informashon insidental ta bai na tur prensa sea e ta akreditá òf nò. Tur informashon por haña tambe ribe e wèpsait di e servisio di Reino Caribe Hulandes. Lo bin kambio den esaki awor ku tin akreditashon? Mi ta kontesta mi mes i mi ta bisa ku mi no ta kere ku esaki lo ta e kaso. Akreditashon ta drumi masha serka di strobamentu di e derecho di libertat na informashon. Kon ta pará ku periodistanan ku no ta biba na Boneiru? Nan mester di akreditashon tambe pa kubri un evento di e servisio di Reino Caribe Hulandes òf di awor pa dilanti nan ta dependé di nan kolega lokal akreditá?

E servisio di Reino Caribe Hulandes por último a duna resultado di e investigashon di media. E resultadonan no ta duna bista riba e interesnan di un oyente òf un lesadó di korant pasobra a laga afó un parti importante ku ta e parti sosio demográfiko di e isla. E karakterístikanan di e isla manera edat, género, etnisidat, nivel di edukashon, entrada etcétera ta hopi importante pami por interpretá dikon sierto porsentahe ta skucha un radio emisora. Por ta mui bien posibel ku 60% di e poblashon ta skucha e programa di Nochi Willem di 1or pa 2or, pero despues di esei ta swech bai otro emisora. Anto ta ken ta e lesadónan di e korant Extra? Kon a para ku e korant Extra Boneriano? Investigashonnan ku no nesesariamente e servisio di Reino Caribe hulandes mester hasi, pero otronan tambe por hasi esaki, i e resultado sigur lo benifisiá nos tur.

Share This
error: Content is protected !!