KRALENDIJK – Djaweps mainta durante entrevista na Radio Live 99.9 FM, Aimed Ayubi a papia ku Konsehal Daisy Coffie di Frakshon Coffie. El a papia riba algun tópiko, entre nan; plan pa futuro. “Mi ta sakrifiká hopi tempu pa presentá na reunion di konseho insular i ta lástima ku kosnan no ta funshoná manera mester ta. Esaki debí na deskonfiansa na miembronan. Falta di konosementu, no ta tuma desishon i mas. Koalishon ta manera BC, sinembargo e kos no ta funshoná asina. Nos Tarea ta pa kontrolá BC i no pa funshoná manera nan. Esaki ta un di e kosnan ku ta krea problema. Ta di lamentá sinembargo esei ta e kaso.  

Reunion di djarason último 

Reunion di Konseho Insular djarason último a kuminsá 2 minüt pasa di 6or di atardi i algu pasa di 1or di mardugá di djaweps, gezaghèber Edison Rijna a skòrs esaki i pone e fecha di djaluna binidero pa kontinuá. Nos tabata 8 miembro, i vota pa sea stòp òf sigui ku e reunion. El a salu 4pro i 4 kontra. Nos a purba pa yega pa terminá e kos, sinembargo korem no tabata presente i aki gezag a skòrs e reunion te djaluna. Ya ta algun reunion ku a keda di skòrs. No ta promé.  

Danki Dios nos ta den e struktura aktual  

Danki Dios nos ta den Struktura Estatal ku Hulanda. Nan a yuda pa nos pasa den e situashon aktual relashoná ku Coronavírùs, i a logra skapa. Bon ku nos tin e laso ku Hulanda. Coronavírùs tin un impakto fuerte riba mundu, pues nos tambe. Hopi kompania no por kontinuá. Kompará ku otronan, nos ta sobrebibí. Na Hulanda a pone ‘Lockdown’. Hulanda a yuda nos ku esaki, debí ku hopi hende no por bula di Hulanda pa Boneiru, loke tabata plania. Laga nos kuida nos kurpa. Nos ta bon pasobra no tin hopi kaso di hende infektá ku e vírùs menshoná. Solamente si nos kuida nos por mantené stabil. No forma aglomerashon di hende, pasobra esaki tin di aber ku kontribushon a plamamentu di e vírùs desastroso.  

Mi a sinti dushi di polítika 

Mi tin ku bisa for di tempu mi ta independiente den Konseho Insular, mi a sinti dushi den polítika. Awor mi ta mas habri pa papia i atendé, reakshoná riba kosnan ku no ta kana korekto. Mi ta pensa hopi riba kiko pa hasi òf kon ta bai sigui. Pa fin di 2021 mi ta kla pa menshoná kon mi ta sigui. Pues mi tin un aña pa tuma desishon. Tin hopi hende ta sostenémi loke mi ta apresiá. Mi ta deseá pa kontinuá sinembargo no ke sigui ku Partidonan ku ya ta aktivo. Kisas mi por sigui ku MPB si nan reorganisá. Porta un partido propio? Desèmber 2021 lo mi por bisa kiko mi ta bai hasi; regresá MPB mi no ta kere fásil. Riba mi mes mi por funshoná hopi mas mihó i esei ta hasi difísil pa mi bai ku un partido ku ya ta eksistí. MPB no ta parsemi algu, sinembargo kisas nan tampoko ta deseá pa mi kontinuá ku nan. Mi tin un aña pa pensa”, Daisy Coffie a bisa.   

Share This
error: Content is protected !!