KRALENDIJK – Suidadano Onnie Emerenciana a remarká algu interesante ku a sosodé kaminda na dos diferente okashon e ta gara hende ta tira sushi den mondi. El a konta tokante e suseso pa medio di su página di facebook. Tambe el a disidí pa publiká foto di e personanan, pa asina tur hende sa ken ta esnan ku ta yuda daña imáhen di nos isla. “Mi ta presidente di ‘Fundashon Boneiru Limpi i Bunita’, ántes Tene Boneiru Limpi. 

Ami i otronan ta sakrifiká tempu i esfuerso pa hasi e pida baranka aki; unu mas limpi den nos region. Sinembargo e siman aki so, ami ku mi kámara a gara dos bia, hende ta nèt nèt ta kla pa basha sushi den mondi. 

Onnie ta konta: “Nèt mi ta bai trabou pasando patras di Amboina, mi ta lora bògt i topa un pikòp kla pa bai benta sushi nort di e bògt. Ma para dun’é tur título ku ami tin, ’gebiedscoordinator’, ‘presidente di Fundashon Boneiru Limpi i bunita, ‘buitengewoon agent de politie’. Ma para bis’é bai landfill i mi a saka su potrèt. 

Sinembargo no tabata e úniko hende ku Onnie a gara.

“Mi yega nèt na un krusada ku mi por bai mi kunuku na dam di Toon, un kos a bisami bai wak Papai su kunuku, basta dia mi no a bai i mi di ku Toby ban wak papai su kunuku. Yega einan topa un trùk yen di sushi para dilanti kunuku. Mi a bai wak i atrobe mi a topa un ‘paisa’ ku tabata bai basha su sushi dilanti mi tata su kunuku. E la kore skonde sinembargo debí ku mi a bira bai riba e trùk, e mester a sali. 

Mi di kuné e no por basha e sushi einan. Mi sanger tabata kushiná i pa mi no hasi kos mahos, i mas bien pa Toby, mi a keda trankil. Mi tabata kla pa mande kaminda el a sali i baha kohé ku sla. Mi a saka su potrèt bai, i mi sa ken e ta. Mi a para mira promé kon e ta pasa su kabuya, mara su sushinan den pikòp promé ku mi a bai kunuku. 

MESTER TRESE E KOSNAN AKI DILANTI I ATENDÉNAN 

Mester lanta un diskushon i trese e problema aki den publisidat. No  por ta asina ku mi ta dediká 2 pa 3 ora liber tur djaluna pa tene Boneiru limpi i otronan ta susha nos isla. Asta pòrnada landfill ta riba djasabra i djadumingu, sinembargo ta den mondi tin ku tira e sushi. Un yamada ta bai na tur hende pa saka potrèt di e tipo di hende porko ku ta tira shushi den mondi momentu ku gara nan. Pone e potrèt riba medio sosial, ya tur hende sa ken ta susha nos dushi isla. Ámbos kaso tabata trata di estranhero”, Onnie Emerenciana a bisa. Ban spera ku algu sali afó i outoridatnan konserní tuma akshon nesesario.

Share This
error: Content is protected !!