KRALENDIJK – Un soño ku a bira realidat 25 aña pasá a forma parti importante di e desaroyo di turismo na Boneiru. Dos hóben di Boneiru i unu di Aruba a planta e simia di un idea pa lanta e negoshi ‘Bonaire Windsurf Place’ (BWP) pa práktika e deporte di windsurf na Boneiru den e área di Sorobon, Lac Bay.

E dos hóben boneriano, Elvis “Piskechi” Martinus i Constantino “Patun” Saragoza i e hóben rubiano Roger Jurriëns, huntu a bira e promé empresario lokal den e deporte di windsurf na Boneiru. Nan a sa di desaroyá e idea logrando surpasá diferente opstákulo i sigur ku hopi pasenshi, lucha i determinashon. Awe sigur por rekonosé nan, komo e pioneronan di windsurfing aki na Boneiru.

Desde 1989 a kuminsá ku preparashon pa despues sigui ku e trámitenan pa risibí e permiso pa establesé e edifisio na e sitio ku a skohe. Durante e temporada ei tabata tin diferente estudio tumando lugá den e área di Lac i mester a warda bastante tempu pa por a sigui ku e proseso. Despues mester a mantené na e reglanan stipulá dor di e resultado di e estudionan hasi. Propetarionan di BWP a invertí den un edifisio di palu ku mester a bini Boneiru desde Norwega. E edifisio aki tabata esun ku a pas den e área i a keda hopi bunita i úniko e tempu ei.

Riba 23 di desèmber 1995 BWP a habri su portanan pa promé biaha i e promé kliente tabata famia Poften di estado di Colorado Merka. Den e temporada aki windsurf no tabata popular ainda na Boneiru manera e ta awendia. BWP a asta trese periodista internashonal na vários okashon pa hasi promoshon den eksterior pa BWP i tambe pa Boneiru komo e destinashon pa windsurf. E temporada aki, Facebook i otro plataforma di medionan sosial no tabata eksistí. E parti di promoshon tabata totalmente otro i diferente ku awor.

Durante e temporada aki Aruba si tabata hopi popular den turismo di windsurfing. Roger, e hóben rubiano tabata tin su mesun negoshi di akomodashon kombiná ku windsurf na Aruba desde 1987, ku porsierto tabata e promé tipo di akomodashon ofresiendo e tipo di pakete aki. Pa desaroyá e turismo di windsurf na Boneiru, BWP a krea un pakete ku e kombinashon pa windsurf na Aruba i algun dia na Boneiru. Ku e propósito pa e turista será konosí ku Boneiru. E bishitantenan tabata asina impreshoná ku nos isla, i hopi di nan a preferá Boneiru pa sigui ku nan vakashon. E desaroyo a bai asina bon na Boneiru ku Roger a tuma e desishon pa sera su negoshi na Aruba i establesé su mes na Boneiru. Esaki sigur tabata nesesario tambe pa duna Piskechi i Patun e sosten den e negoshi ku tabata desaroyá rápidamente i ku éksito.

Riba 23 di desèmber 2020, Elvis “Piskechi” Martinus, Constantino “Patun” Saragoza i Roger Jurriëns ta sumamente orguyoso ku huntu nan ta selebrá 25 aniversario di Bonaire Windsurf Place. Komo e promé propetarionan lokal di BWP i te ainda ta keda marka historia pa Boneiru. Sigur nan por ta orguyoso di nan mes i tambe di e simia ku a planta mas di 25 aña pasa ku awe por mira e fruta di dje tantu pa nan mes i tambe pa Boneiru komo un di e destinashonnan mas popular pa windsurf awendia.

“Bonaire Windsurf Place ta yama danki na tur esnan ku a aportá durante e aña nan ku a hasi BWP eksitoso. Ta difísil pa menshoná tur nòmber pa no lubidá niun persona òf instansia. Masha danki di kurason”, segun propetarionan di BWP.

Pa felisitá BWP ku nan 25 aniversario por manda felisitashon na info@bonairewindsurfplace.com

Share This
error: Content is protected !!