KRALENDIJK – Awor ku nos tin kasonan nobo, ta ora pa tuma medida mas severo. Entrante djadumingu 3 di yanüari te ku djaluna 18 di yanüari 2021 e siguiente medidanan ta bai konta.     

Ta regla tur medida ku tin di aber ku fase tres den un ‘besluit’ di gezaghèber huntu ku e Lei Temporal Medidanan CoViD-19. 

Ta permití un máksimo di 10 hende na enkuentro den seno privá na kas. Mucha te 13 aña no ta inkluí. Ta konsehá hende vulnerabel, manera nos hendenan di edat avansa, òf hende ku tin un malesa króniko pa nan keda kas.  

Establesimentunan di hóreka por usa maksimal 50% di nan kapasidat. Tur hende mester sinta na lugá fiho. Tur establesimentu di hóreka mester sera dies or di anochi.   

Diskotèk i kas di plaser ta keda será.  

Sauna, kasino i teater di sine por keda habrí basta nan usa maksimal 50% di nan kapasidat.  Kasino mester stòp di sirbi òf bende bibida i kos di kome 10 or di anochi, i kasino mester sera 12 or di anochi. 

Ta supliká tur misa i iglesia pa durante  misa òf sirbishi okupá un máksimo di 50% di e espasio disponibel. Ta konsehá tambe pa no kanta. Despues di misa òf sirbishi ta konsehabel pa tur hende bai kas mesora.  

Por tene enkuentro deportivo paden. Mester usa un máksimo di 50% di kapasidat di e lugá di deporte pa enkuentro deportivo paden.  Pa aktividat di deporte pafó no tin restrikshon.  Na  enkuentro deportivo paden i pafó no ta permití públiko. Despues di e enkuentro tur hende mester bai kas mesora.  

Ta konsehá pa tur trahadó traha mas tantu ku ta posibel na kas. Hende ku un trabou di kontakto manera hasidó di kabei, trahadó den salòn di uña, por sigui traha basta nan bisti tapa boka.  

Tur tienda i pakus por keda habrí. Na pakus i tienda un máksimo di 2 hende di kada kas por drenta.   

Akohida pa mucha i tur tipo di skol ta keda habrí. Na tur skol i akohida di mucha, adulto mester mantené 1,5  meter di distansia di otro.  

E dekreto di emergensia ku nos tin awor, e ‘noodverordening’,  ta keda na vigor te ku 18 di yanüari binidero. Kisas boso ta kòrda ku for di dezèmber aña pasá, den e dekreto di emergensia ta fiha solamente e reglanan pa hende ku ke biaha bini Boneiru. E reglanan ei ta keda konta. Tur hende ku ke bini Boneiru mester hasi un PCR tèst, e resultado mester ta negativo. Nan mester yena tambe un deklarashon di salú di departamento di Salubridat Públiko. 

Nos kada un ta responsabel pa tene nos isla seif. Pa kuida nos mes i otronan. Nos departamento di Salubridat Públiko ta traha duru pa evitá ku e vírùs ta plama. Nos por logra esaki solamente si abo, ami i nos tur koperá. Mantené 1,5 meter di distansia i kumpli ku e reglanan manera tosa i nister den bo èlebog i evitá aglomerashon. Si e sifranan di infekshon sigui subi, nos lo bini ku medidanan mas severo pa kombatí esaki”, gezaghèber Edison Rijna a bisa. 

Share This
error: Content is protected !!