KRALENDIJK – E rotònde nobo na Kaya Amsterdam no ta korekto konstruí. Radio Live 99.9 FM ta disponé di e informashon ku a konstruí e rotònde ku midi inkorekto, otro for di loke tin riba e mapa diseñá pa e sitio. No sa ken a kometé e eror i ken ta bai paga e gastunan pa kibra i drecha e kaminda di nobo. No solamente na e rotònde aki, sinembargo e krusada dilanti di NAPA Auto Parts a sosodé meskos (Kaya Carlos A. Nicolaas). Na sigur 2 okashon a kibra i hasi kambio di situashon ku no tabata korekto pa drecha esaki. Awor ta konstruí otro rotònde ku tambe tin kos ku no ta korekto. Ken ta dirigí, guia, kontrolá e trabounan di entre otro asfaltamentu di kaminda? Òf ta hasimentu di kos tin konsientemente pa haña ganashi èkstra? Esaki ta loke Aimed Ayubi, direktor di Radio Live 99.9 FM a menshoná. 

ROTÒNDE MAL KONSTRUÍ

A palabrá ku ta bai habri e rotònde 11 di desèmber 2020, sinembargo no a realisá esaki. Na final na momentu ku dia tabata serka, a tuma desishon pa mantené e rotònde será debí ku ta evitá pa trùk pisá i treiler pasa riba e rotònde. Radio Live 99.9 FM ta disponé di e informashon ku debí ku algu a bai kompletamente robes pa loke ta trata midí di e rotònde, pues no por habri e rotònde pa tráfiko. Un komunikado ku a sali ofisial di gobièrnu di Boneiru no ta papia nada ku tin un situashon inkorekto na e sitio.  

Angelo Clarinda di Caribbean Proyect Developers ta e persona kende a pinta e mapa di e rotònde i ku tur midí nan pa ehekut’é. Ta trata di e rotònde ku ta konektá ku Kaya Amsterdam i Kaminda Djabou. “Momentu mi a tende ku Aimed Ayubi a papia di loke a sosodé na e rotònde Kaya Amsterdam, mi a tuma den pa bin radio i splika algun kos. Mi a studia i traha hopi na Hulanda. Mi kompania ta ehersé diferente trabou, entre otro pa pinta preyekto di kaminda na Boneiru. Mi ta aprobá pa Hulanda pa diseñá kamindanan na Boneiru. E diseño di e rotònde tabata pa un treiler ku kònteiner di 40 pia por lora den e rotònde sin niun problema. Loke tin di loke ami a pinta; no ta kuadra ku e rotònde ku a keda konstruí na e sitio menshoná. Mi a tuma nota ku bèrdat e midí a kambia, sinembargo no ta mi tarea pa bai informá dikon a desviá. Otro kos ta; e rotònde a bira mas chikitu i e gastu pa konstruí mester a baha. Loke tin ku sosodé awor; mester destruí loke a traha, pa hasié manera e mester ta. Ken a hunga den e midí nan sin ku gobièrnu ta na altura tampoko no ta konosí. No ta esaki tabata tin pintá riba mapa. Mi a traha na Venezuela, Merka, Cuba, Hulanda i mas. Pues mi tin sufisiente eksperensia kiko i kon ta e mihó manera pa konstruí entre otro kaminda pa vehíkulo motorisá kore riba dje. Ta bon pa esnan konserní atendé ku hende ku konosementu di e materia, pa evitá ku kos ta bai inkorekto, entre otro loke a sosodé na e rotònde menshoná”, Angelo Clarinda a bisa.

E pregunta ta; Ken ta bai paga e gastu èkstra pa kibra i drecha e rotònde korektamente?    

Share This
error: Content is protected !!