KRALENDIJK – Dayerona Richards(27) a haña 10 aña kastigu di prisòn pa asesinato di e hòmber norteño Rafelino ‘Rafi’ Boezem. Djabièrnè último hues a dikta sentensia den e kaso di asesinato, kaminda Dayerona ta e persona kende a kita bida di e víktima, ku hinká di kuchú. Esaki a tuma lugá djadumingu 14 di yüni 2020 den oranan tempran di mainta na kas di e víktima na Kaya Otomac. E hòmber a risibí diferente hinká riba e dia menshoná i a fayesé. A presentá ku e akusado na Fort Oranje, miéntras famianan di ámbos banda tabata presente. Hues a dura mas o ménos 20 minüt i pa despues Dayerona bandoná sala di korte Henk W. Welvaart, ku e sentensia di 10 aña kastigu di prisòn, kitando e dianan ku ya el a sinta den aresto preventivo. E kantidat di aña di prisòn ta loke fiskal mr. Teengs Gerritsen a pidi pa e akusado resientemente durante tratamentu di e kaso. Dayerona R. tin 14 dia pa apelá e sentensia di kastigu di prisòn di 10 aña si e ta deseá. Un di e pruebanan kombisente pa korte tabata deklarashon konsistente di Angelina K., e amiga di Dayerona. E deklarashonnan aki i e propio deklarashonnan di Dayerona ta lokual prinsipalmente a inkrimin’ é. Tabata tin algun vershon ta sirkulá riba kaya i tambe durante tratamentu di e kaso anteriormente ku lo tabata tin mas hende metí den e kaso aki. Dayerona a keda para riba ku e so tabata presente na e sitio di delito. Korte a tene kuenta ku Dayerona tin dos yu chikitu i nunka ántes e no tabata tin kontakto ku hustisia. Famianan di e defuntu (Rafi Boezem) na e sitio, tabata hopi emoshoná i desgustá ku e sentensia. Nan no ta kontentu ku e 10 aña pa Dayerona, kende a kita bida di nan ser kerí. “No tin hustisia riba e luga aki”, tabata algun gritu ku por a skucha despues di e sentensia. Famianan a bandoná e sitio ku hopi lágrima i desgustu. Potrèt ta duna un bista di e momentu ku a trata e kaso den korte.      

Share This
error: Content is protected !!