KRALENDIJK – Radio Live 99.9 FM a papia ku diputado Hennyson Thielman, tokante su posishon nobo komo diputado. E tin awor 1 luna den e funshon i el a papia di plannan ku tin pa simannan ku ta bini. “Nos a tuma e promé luna pa mas bien prepará i deliñá e áreanan ku nos ta bai pone hopi atenshon i e prioridatnan ku ta rekerí atenshon purá. Nos a sinta i huntu nos tin un plan stabil pa kuminsá traha. E siman nan aki nos a buska tambe fondonan èkstra pa loke ta trata drechamentu di kaminda i yuda hendenan ku a pèrdè trabou durante periodo di Coronavírùs. Ta trata di fondonan ku nos mes tin pa por hasi loke nan ta mas di nesesidat aktualmente. Áwaseru a kai hopi último tempu i esei ta rekerí atenshon ku poko mas esfuerso pa logra mas kos i rápido. Pa esaki nos ta tira bista den nos mes presupuesto pa yega na mas sèn pa e proyektonan. Por lo ménos 400 persona a pèrdè trabou i no a haña otro trabou. Nan ta inskribí na ‘Plenchi di Trabou’ i nos tin kontakto ku nan. Ta buskando manera pa por yuda nan ku un trabou den gobièrnu, pa entre otro nan hasi trabounan di mantenshon manera fèrfmentu di edifisio, kapmentu di rama, mantené rotònde etc. Asina nos ke yuda te kaminda ta posibel. Tambe ta andando pa wak kon por laga turista yega Boneiru pa asina aes hende haña trabou pa nan kontinuá. Tin hende ku ta haña yudansa, sinembargo no ta tur, pues tin tur atenshon pa yuda e hende pa e por kubri su gastunan di fin di luna”, diputado Hennyson Thielman a bisa. 

Share This
error: Content is protected !!