KRALENDIJK – Bonairiaanse Tafel Tennis Bond (BTTB) den ehekushon di parti di su plan stratégiko di aña 2019 a prepará i sertifiká algun pèrsona komo entrenadó/coach a base di e reglanan di sertifikashon di International Table Tennis Association (ITTF). Ku esaki Boneiru tin awó mas entrenadó/coach sertifiká pa por yuda ku e entrenamentu pa e hóben nan pa nan desaroyá den e deporte di pinpòn.

E preparashon a tuma lugá durante 2019 ku asistensia di ITTF ku a pone un entrenadó/coach sertifiká ku hopi aña di eksperensha disponibel pa dirigí e kurso di entrenadó/coach nivel 1 pa e personanan di Boneiru. Esaki kompletamente riba gastu di ITTF. E entrenadó tabata Rafael Armendariz di Ecuador ku durante un siman a dirigí e kurso. In total a kuminsá ku 9 partisipante di kual dos a kai afó na kuminsamentu i unu no a pasa e eksamen. BTTB a probechá di presensia di e entrenadó/coach aki pa organisá tambe un klínika pa hóben nan. Mester remarka ku na e klínika aki a partisipá mas ku 40 mucha di diferente skol básiko.

Pinpòn ta un di deporte nan ku apesar di e pandemia di Covid-19 aki na Boneiru, e deportista nan por sigui train mirando e distansha ku tin entre e dos hungadó nan na mesa.

Djarason último BTTB despues di a risibí e sertifikado nan di ITTF a organisá entrega di sertifikado na e seis entrenadó/coach nan nobo ku Boneiru tin. E entrenadó/coach nan aki lo ta enkargá ku entrenamentu i guia di e deportistanan ku ta práktika pinpòn. E entrega a di sertifikado a tuma lugá durante un entrenamentu anochi. Na yegada di e representante di Diputado di deporte James Kroon, e number di e persona ku a representá Diputado Kroon ta Jeffrey Levenstone. Presidente di BTTB señor Junny Vos na inisio di e entrega di sertifikado ta felisitá e sinku partisipantenan inkluyendo su mes ku e logro aki i ta introdusí señor Jeffrey Levengstone. Señor Levenstone a bisa durante su speech ku “sertifikashon di entrenadó nan ta e manera pa duna garantia di kalidat i kontinuidat pa un ramo di deporte. Esaki sigur ta un bon ehèmpel di parti pinpòn, ta kos pa sigui. “ Ohalá mas ramo nan di deporte sigui e liña aki”. Señor Jeffrey Levengstone tambe a rekordá i menshoná ku e tambe a práktika e deporte aki den pasado i ta p’esei e ta kontentu di mira kon e deporte di pinpòn ta desaroyando i ta orguyoso ku Boneiru awor ta disponé di seis entrenadó/coach nobo. Despues di palabra di señor Levengstone a sigui e entrega di sertifikado na e entrenadó nan. Señor Vos ta menshoná na presentenan ku durante e entrega aki tambe tabata presente virtualmente e dosente señor Rafael Armendariz i tambe señor Carlos Manuel Esnard, kordinadó di desaroyo pa ITTF.

Riba e kombinashon di potrèt por mira e seis personanan risibiendo nan sertifikado for di man di presidente di BTTB i señor Levengstone den representashon di señor Kroon. Shirley Bernard Winklaar, Shaquille Hasel, Charls Lont ku no ta riba e potrèt, Cesar Mejia, David Romo i Gilberto (Junny) Vos presidente di BTTB.

Share This
error: Content is protected !!