KRALENDIJK – Problema di BOPEC ta un asuntu geo-polítiko. Esaki ta entre otro loke Norwin ‘Nochi’ Willem di USIBO a bisa durante un enkuentro ku prensa. “Nos di USIBO a haña e yamada pa duna asistensia i manera ta pará den statuto, nos a sinta rápido ku e sindikatonan na mesa pa atendé e problema di BOPEC. Nos a tuma nota rápido ku ta trata di un problema geo-polítiko. Huntu nos a yega na e senarionan ku por tin den henter e asuntu aki. Por lo ménos 8 senario, kada un ku nan konsekuensia. 

: BOPEC keda habri, sera, a pone kreditario riba BOPEC; ILT ta desaprobá tur instalashon, e departamentu di Merka i mester duna lisensia i eksepshon pa komersialisá petroli i laga dòler drenta, por nengá di prolongá esaki; Gobièrnu di Boneiru por nenga di prolongá e pèrmit di operashon i tambe por bisa ku nan no a kumpli ku kondishon di erfpacht,  BOPEC ta pidi bankarota i 2 òf mas kreditor por pidi bankarota di BOPEC. Basa riba esaki nos a bisa mester habri e deliberashon riba un otro nivel. Nos a enbolbí tur instansia ku tin influensia riba BOPEC. Entre otro gezaghèber Edison Rijna, Stuurgroep, Taskforce. Tambe nos a bai den e parti di Antia. Tambe a papia ku Raymond Knops i otronan. Nos a konsehá pa sindikatonan traha un akuerdo di koperashon ku otro, kaminda no ta sinta na mesa separá, sinembargo ta sinta huntu atendé e problema. Nos a purba tene e union, sinembargo e no a logra. Esei no ta nifiká ku nos no a sigui yuda. Loke si e akuerdo di koperashon a yuda ta lo siguiente i e ta bira e kompas pa kana riba dje.  

: Hasi yamada riba gobièrnu Hulandes pa karga su responsabilidat pa entidat Públiko di Boneiru. Papia ku Merka pa yega na un manera pa kontinuashon di BOPEC. Karga responsabilidat pa yuda tur esnan ku ta den situashon fastioso relashoná ku e situashon di BOPEC.  

A purba tur manera pa señor Corredor duna kara na Boneiru. El a purba papia separá ku sindikalistanan i nos a bis’é esei no ta yuda pa yega na solushon. El a bon Kòrsou nos a pidi pa invit’é pa e bin Boneiru. E no a bin Boneiru i a regresá Venezuela. Niun gobièrnu (hulandes òf di Boneiru) tin kontakto ku PEDEVESA. Pues niun hende no sa kiko tin den kabes di doño di BOPEC. Si no yega na un situashon legal i den e kaminda ku nos ta awor, e trahadó di BOPEC ta kore hopi riesgo. Nos tin ayudo di gobièrnu, loke nan por duna den e parti aki loke ta limitá. Ta simplemente paga awa i koriente i kisas hür di kas 2 luna. Departamentu di labor por tuma desishon ora BOPEC sera, nan lo paga sesantia. E trahadó por hasi petishon pa ònderstant, loke ta mará na kondishon, pues e no ta bai funshoná. Asina diferente situashon mas. No por sinta ketu mas. E situashon ta serio!”, Norwin Willem di USIBO a bisa.        

Share This
error: Content is protected !!