KRALENDIJK – Djaweps 4 di febrüari último, USIBO den su totalidat (5 presidente i sekretario general) a tene un reunion bipartit ku Gobièrnu di Boneiru den persona di diputadonan Hennyson Thielman i Nina den Heyer akompañá pa konseheronan di e dos diputadonan. A atendé diferente punto di importansia pa loke ta maneho di gobièrnu i punto di bista di gobièrnu riba e siguiente puntonan.

1. Maneho di gobièrnu pa ku “uitzendbureau”

2. Posishon di gobièrnu pa ku oumento di sueldo mínimo

3. E situashon riba merkado laboral komo konsekuensia di Covid-19 i e menasa pa loke ta e situashon na BOPEC

4. Kontratonan di durashon kòrtiku

5. Fondo di desempleo

6. Asuntu di Penshun di Fondo di Penshun Karibense (PCN)

7. Fleksibilisashon di merkado laboral.

Partidonan na mesa a orientá ku otro riba tur e puntonan aki ku ta interkonektá ku otro pa asina trata na sinkronisá i kordiná un maneho koherente i konsistente. USIBO di su parti a mustra ku riba merkado laboral di nos isla tin basta punto di atenshon pa atendé, ya ku e sindikatonan a konstatá basta abuso laboral. Riba e tereno laboral mester tin supervishon i mantenshon di nos leinan laboral.

Opviamente e tragedia di BOPEC tambe a subi mesa i mester bisa ku Gobièrnu di Boneiru dentro di su kapasidat i límitenan komo gobièrnu a tuma tur medida pa prepará pa un senario kaminda lo tin pèrdèmentu di trabou, Tantu gobièrnu komo USIBO ta sigui vigilá e situashon di aserka. Komo ku ta trata di un empresa privá, gobièrnu en todo kaso ta vigilá e desaroyonan, miéntras USIBO lo monitoriá pa den tur forma salbaguardiá e interes di e trahadónan i nan famia. USIBO den esaki ta keda habrí pa duna asistensia na e sindikatonan ku ta representá e trahadónan, miéntras lo no tin distinshon pa yuda i duna asistensia na tur trahadó di BOPEC. Pa USIBO e trahadó i su famia tin tur preferensia. USIBO ta lamentá si e aktitut di gerensia di BOPEC ku en bes ku den un madurá sinta na mesa ku sindikatonan pa atendé e situashon ta krea divishon lubidando ku bon práktika di dunadó di trabou no ta solamente pago di salario. Un bon ambiente di trabou, un bon relashon ta mesun importante pa garantisá e salú mental di e trahadónan i nan famia. BOPEC den opinion di USIBO tin trahadónan i nan famia sekuestrá i no por ni duna garantia di kontinuidat di e operashon i kuné garantia di kumplimentu kabal di nan obligashonnan poné den nan kontrato ku e trahadónan. Hopi lo no ta realisá ki impakto e insertidumbre ku e empleadonan i nan famia ta bibando aden ya pa hopi tempu tin riba e salú mental.

Share This
error: Content is protected !!