KRALENDIJK – Union di Sindikatonan Boneriano USIBO, den un reunion bi-partit ku gobièrnu di Boneiru a papia tokante e desaroyo den Pensioenfonds Caribisch Nederland (PCN) kaminda resientemente a anunsiá ku e ‘pensioenopbouw’ di e miembronan a baha di 1.75% pa 1.23% pa aña debí na desaroyonan riba merkado di kapital, kaminda e interes ta hopi abou. Riba e punto aki USIBO lo aserká PCN pa un seshon di informashon pa e sindikatonan ku tin miembro afiliá na PCN. Ta trata aki di e sindikatonan ABVO, NAPB-BES, AFBW i SIMABO. Por mira bèk riba un reunion hopi fruktífero kaminda tur e dos partidonan tabata habrí pa huntu buska i formulá e mihó maneho/vishon pa e klase trahadó den e desaroyo nobo ku Boneiru ta pasando aden. Den esaki un biaha mas USIBO ta hasi un yamada fuerte riba e klase trahadó pa uni su mes den un sindikato pa asina e bos di e klase trahadó bira aun mas fuerte i ku e klase trahadó ta risibí e rèspèt, e rekonosimentu i e rekompensa ku e ta meresé pa su kontribushon den e desaroyo aki.

Share This
error: Content is protected !!