KRALENDIJK – Waf di sùit ku tin e nòmber ‘Waf Nello Craane’, ta notabel algu straño. Radio Live 99.9 FM despues ku algun persona a informá di e situashon, a bai na e sitio pa tuma nota loke a sosodé. Tin indikashon ku na e parti ku a traha nobo resientemente pa alargá e waf, ‘Nello Craane’ a sak. Di otro banda, ta parse ku e no a sak, sinembargo algu a sosodé, sea e midi no ta korekto òf durante basha mentu di betòn, algu a bai poko robes. Echo ta ku tin un bahada den e waf solamente un banda.

Radio Live 99.9 FM a buska kontakto i a papia ku havenmeester Gunther Flanegin, kende a splika ku e motibu ku un parti di e waf bèrdat tin un bahada, loke nan ta yama ‘afloop’ ta pa e awa bai. Aparte di e bahada, tur kos ta korekto, segun el a bisa. Esnan ku a informá Radio Live di e situashon ta bisa: “Si di bèrdat e ta bahada ‘afloop’ pa awa bai, dikon e ta solamente un banda di e waf? Dikon no a trahe stret i pone buraku mes kos ku a hasi na e otro banda di e waf? Pues si e bahada ’afloop’ ta funshoná pa awa bai, esei ta nifiká ku otro banda di waf ku no tin e bahada ta mal konstruí. Konklushon. Sea pariba òf pabou ta inkorektamente konstruí, nan a bisa. Momentu ku a saka potrèt, algun persona tabata bora den e waf pa awa no keda riba dje. Esaki nan a hasi ámbos banda di e waf, esta esun ku supuesto ‘afloop’ i esun stret.

Mas den oranan di atardi despues ku Radio Live99.9 FM a manda algun potrèt di e situashon pa sr. Flanigen, el a informá ku ta un barku a bati unpoko i kousa daño na esaki. A midi esaki i lag’é asina pa motibu ku e no por sak mas. Echo ta ku e no a sak di su mes, havenmeester a bisa.

Share This
error: Content is protected !!