KRALENDIJK – Dia 22 i 25 di febrüari próksimo lo tin e promé reunión di Diálogo Sentral pa aña 2021. Diálogo Sentral ta e plataforma den kua e partidonan Kamara di Komersio komo órgano di konseho, organisashon di dunadónan di trabou, organisashon di sektor laboral i gobièrnu ta sinta huntu pa trata na yega na kompromisonan serio pa karga nos desaroyo sosial-ekonómiko huntu. E plataforma ta sirbi tambe komo kuerpo di konsulta i di konseho pa ministerionan na Ulanda den nan formulashon di maneho riba temanan sosial-ekonómiko pa isla di Boneiru. E plataforma apesar di e pandemia den 2020 a logra funshoná efektivo i ku resultado. En total den 2020 e Diálogo a reuní den 5 tanda ku 8 reunion ofishal. Banda di e reunionnan aki a bin huntu un biaha den un reunión ekstraordinario ku sekretario di estado nobo kaminda a trata e temanan tokante krisis di corona, punto di referensia pa ku mínimo sosial i desaroyonan pa ku sueldo mínimo. Durante e reunionnan regular a trata diferente temanan, a forma diferente grupo di trabou, a stipulá un kuadro di maneho komun, a saka diferente konseho i deklarashonnan.

Un di e deklarashonnan ku nos kier sita ta esun ku a sali relashoná ku BOPEC. E ta bisa na Ulandes: “ In de op 29 juni 2020 getekende ‘Verklaring 7’ onderstreept de Centraal Dialoog het belang van behoud van werkgelegenheid bij BOPEC. Hierbij wordt steun uitgesproken voor de inspanningen van de vakbondvereniging USIBO in het streven naar gunstige oplossingen voor de werknemers van dit bedrijf”.

Tradusí na Papiamentu e ta bisa. Diálogo Sentral ta suprayá mantenshon di kuponan di trabou na BOPEC. Ku esaki nos ta ekspresá nos sosten pa ku e esfuersonan di USIBO pa lucha i yega na solushonnan faborabel pa trahadónan di e kompania aki. Mas kla no canta el gallo. I te ainda nos ta sigui lucha te na final pa e meta aki realisá. E deklarashon ta karga aprobashon i sosten di tantu gobierno komo organisashon di dunadónan di trabou i opviamente e sektor laboral.

Pronto e raportahe anual 2020 kompleto di e aktividatnan di Dialogo Sentra lo ta publiká. Pa esnan interesá, nan por subi e WEBSITE di Dialogo Sentral Boneiru:’ www.Centraal Dialoog Bonaire.com i por lesa tur informashon detayadamente. E representantenan den Dialogo Sentral pa USIBO ta Mavis Abrahams, Robert Sances, Gerold Bernabela i Norwin Willem. Si bo tin un tema ku bo ta kere meresé atenshon aserká libremente un di e personanan aki.

Share This
error: Content is protected !!