KRALENDIJK – Ya pa algun siman e pintor Tymon de Laat huntu ku hóbennan di Liseo Boneriano i MBO ta pintando riba diferente muraya riba e isla. Ta trata di e proyekto ‘Street Colors Bonaire’. Radio Live 99.9 FM a papia ku e pintor profeshonal i el a konta su eksperensia komo pintor. “For di 2007 mi ta un pintor profeshonal. Bon bisá un ‘Street artist’. Mi ta pinta spesialmente riba muraya, pinturanan grandi, sinembargo mi ta gusta pinta un hende, esta wak e potrèt i pinta e persona.

Mi ta traha na Hulanda i a bai diferente parti di mundu. 3 aña pasá mi tabata na Kòrsou. Aparte di Kòrsou mi a bai Singapore, Merka i algun pais mas, pa pinta riba muraya. Awor nan a pidimi pa mi bin Boneiru pa duna lès na hóbennan, yuda i inspirá nan, pa den futuro nan por uz’é pa nan trabou. Ta trata di mucha i hóben di entre 12 pa 20 aña. Mi ta keda Boneiru te final di luna di febrüari. Despues ta sigui otro persona ku e tarea di pintamentu. Entre otro nos a pinta riba muraya na altura di Little Havana, hòfi kultural, Budget Marine i mas”, e pintor Tymon de Laat a bisa. Radio Live 99.9 FM a papia ku un di e hóbennan, miéntras e tabata pinta. Ta trata di e hóben Eder Curiel kende awor a bin biba na Boneiru.  

“Hopi tempu mi ta pinta riba papel i esaki ta un bon oportunidat pa pinta riba muraya. Un eksperensia nobo. Normalmente mi ta pinta pretu ku blanku, sinembargo awor ta ku kolo, mas interesante mi ta haña,” e hóben Curiel a bisa. 

Potrèt na momentu ku e hóbennan i Tymon de Laat tabata pintando riba muraya di un kompania di drecha boto na Kaya Industria Pariba

Share This
error: Content is protected !!