KRALENDIJK – Dr. Willem Cecilia den un komunikado emití resientemente pa prensa ta papia tokante korelashon outonomia i salubridat públiko.

“Den e revista hulandes pa medisina i tambe den e revista akadémiko oropeo pa salubridat públiko, a keda publiká un investigashon interesante pa loke ta trata e korelashon entre salubridat públiko di islanan den Karibe ku tin outonomia i e islanan ku di un òf otro manera tin un laso direkto ku e antes ‘madre patria’.

E sientífikonan Verstraeten, van Oers i Mackenback a hasi un investigashon pa loke ta trata e periodo di 1980 pa 2014, pa haña sa kon e sifra di mortalidat di Hulanda, Aruba i Kòrsou, por keda kompará ku otro paisnan oksidental ku tin teritorionan atministrativo den Caribe. Pa logra hasi esaki a hasi un analisashon di e sifranan di mortalidat, i informashon pa loke ta trata e kousa di morto. A tira bista riba e mortalidat standarisá pa loke ta trata edat, kousa di morto i tambe pa loke ta trata espektativa di bida entre Hulanda, Estados unidos, Inglatera di un banda i Fransia di otro banda komo paisnan oksidental ku ta atministrá islanan den Karibe.

Resultado ta mustra ku e den e periodo di 1980 pa 2014 tabata tin un bahada di espektativa di bida pa hende hòmber, i un stagnashon pa loke ta trata esun pa hende muhé na Aruba i Kòrsou. E resultado aki ta desviá di esun di Hulanda. E espektiva di bida riba e islanan den Karibe ku tiki outonomia, entre otro e islanan franses i ingles, sinembargo ta kore paralelo ku esun di nan mama patria. Si mester distinguí entre e diferente kousanan di morto ta sali na kla ku malesanan di kurason i kardiovaskular i otro motibunan eksterno ta kontribuí na ekseso di mortalidat den e region di Karibe pero esaki ta ménos faborabel pa e islanan hulandes den Karibe, den e kaso aki Aruba i Kòrsou.

E tendensianan deskubrí ta mustra riba sierto posibel faktornan ku ta spesífiko pa e regio. E embergadura sinembargo di e diferensia detektá pa loke ta trata e kousa di morto ta hopi fuerte, sigur si ta trata malesanan di kurason i kardiovaskular, morto den tráfiko i violensia. Ku esaki e investigashon, kisas in-intenshonal, a krusa e frontera di struktura estatal. E investigashon ta mustra bon kla ku e espektativa di bida den e periodo 1980 -2014 pa loke ta trata e islanan ku tin un grado haltu di outonomia, manera Aruba i Kòrsou, ta bastante menos faborabel kompará ku e islanan ku tin un laso polítiko estrecho ku e mama patria.

Na 2007 un partido polítiko a lansa un vishon pa un fundeshi nobo pa Boneiru. A bin ku 4 punto di lansa pa logra esaki. Un di nan ta adelanto ekonómiko mester bai kompañá pa adelanto sosial, kuido pa naturalesa i mester kondusí na un bon kalidat di bida pa un i tur ku ta biba aki na Boneiru. Tur esaki mester bou di un seguridat i trankilidat indiskutibel. Tumando na kuenta e estado di nos isla den 2021, E investigashon menshoná indiskutiblemente i sientífikamente a konfirmá e kristalisashon pa gran parti pa loke ta trata e vishon ku tabata biba e tempu ei na Boneiru. Algu hopi remarkabel.

Pa terminá i pa komplementá un ke otro mi mester trese lo siguiente dilanti. Den mi tésis na 2018 mi a trese dilanti ku, tumando na kuenta nos identidat, historia i un kresiente konsenshi propio di e isla, fortifiká pa e nesesidat pa outonomia i mantenshon di gobernashon propio, lo ta bon pa tira bista riba un desaroyo fundamentalmente otro pa loke ta trata e aparato gubernamental. Mi a konsehá tambe pa pone atenshon riba bon gobernashon i krea un kultura di propio responsabilidat pa representá i goberná nos isla”, Dr. Willem Cecilia ta bisa.

Share This
error: Content is protected !!