KRALENDIJK – Suidadano kritiko sr. Arthur Sealy den un komunikado pa prensa ta bisa: ”Pa luna di mart tin tres punto ku na mi konsepto, ta importante pa pueblo ta mas enbolbí. Nan ta; akuerdo di atministrashon, bakunashon i elekshon pa parlamentu hulandes. Tur tin influensia direktamente riba e pueblo. E akuerdo di Atministrashon ta kana sumamente lento. Pueblo no ta mira; un mehoransa di atministrashon, Kolegio Ehekutivo no ta duna muestra di ta pone preshon pa drecha e aparato gubernamental, no tin un plan, konosí pa pueblo tokante drechamentu di kareteranan, ta algu no sistemátiko ta tuma lugá, no tin kas sosial, no tin un maneho finansiero, nada riba e parti di trabou i entrada, nada tokante krio di bestia i peska, nada visibel riba dunamentu di tereno”, Arthur Sealy a skirbi den un karta resientemente. “Sekretario di estado RaymondKnopsdi CDA no ta kontentu ku ehekushon di e akuerdo i diputado Kroon, ke pa vota CDA. Relashoná ku e elekshon riba 15,16 i 17 di mart na Hulanda no tin aktividat ta tuma lugá di parti di partidonan polítiko. Si pueblo no tin informashon, ta e partidonan polítiko tin e deber di duna informashon na pueblo pa bai vota. Bonaire ta parti di Hulanda i pueblo mester por bisa kua ta e partido(nan) ku e ta kere ta traha na bienestar di Bonaire. Keda sin bai vota i reklamá ku Hulanda i hulandesnan ta rasista, diskriminatorio i kolonisadó no ta yuda. Djis pensa ta ken ta pèrkurá pa un enseñansa na nivel ku asta otro islanan ta yalurs riba islanan BES, ken ta manda bakuna pòrnada pa Bonaire, ken ta pèrkurá pa Bonaire tin un salubridat na òrdu ku por tin un guia pa ora un pashènt bai pafó di Bonaire. Tokante bakunashon ta solamente konsehalnan Bernabela i TjinAsjoe, a bisa di ta bai bakuná, Konsehal Coffie, ta inkliná, dependé su situashon di salú, pa tuma bakuna i konsehal Abraham, ta duda i ta laga e libertat den man di kada hende. Ami ta bai registrá pa tuma bakuna i ta vota ‘ChristenUnie’ pa sekretario di estado di salubridat, bienestar i deporte señor Paul Blokhuis”, Arthur Sealy a bisa. 

Share This
error: Content is protected !!