KRALENDIJK – E ekipo di futbòl di Rincon s.v. Vespo den partido number 6 di kampionato di futbòl di nos isla, a gana e peruanonan di Arriba Perú den un partido ku a tuma lugá Djadumingu 28 di febrüari último den Stadion Kralendijk na Playa.

Un partido ku a kuminsá  sin grasia diparti tur dos ekipo. Esei tabata bisto tambe na e skor den e promé mitar di e partido. Niun gol no a kai den e promé mitar. Tabata den e di dos mitar ku e wega su ritmo a kambia.

Den e di dos mitar na di 56 minüt, Jameson Piard ta habri e markadó i ta hiba e ekipo di Vespo 1-0 dilanti. Na di 67 minüt, Alexander Piard ta skor e di dos gol pa Vespo. Ariba Perú a purba di tur manera pa yega na e gol pa kòrta bentaha pero esaki sin resultado. Na final di e partido, na di 90 minüt Raydolf Felix ta hinka un gol mas pa Vespo i ta finalisá e partido ku skor 3-0.

Rèfri ku a dirigí e di seis partido di e kampionato ta Geofrey Angela.

Despues di e partido djadumingu, djarason 3 di mart pa 8’or di anochi, s.v. Uruguay di Antriol Pariba ta enfrentá s.v. Juventus di Playa Pabou/Antriol. Por sigui e partido aki via e sistema di ‘Live Streaming’.

Riba potrètnan e timnan, outornan di e golnan i e kuerpo di rèfri ku a dirigí e partido.

Share This
error: Content is protected !!