KRALENDIJK – Despues di lunanan di trabou duru, un temporada ku hopi kambio den e normal nobo ku sigur preparashon intensivo i hopi sakrifisio di parti kada un di e partisipantenan, porfin nos a drenta den e último siman pa e anochi final di Miss Tourism Bonaire 2021. E konteo regrestivo ta bayendo ku ful spit i ta kuestion di poko dia pa bira konosí ken lo ta e siguiente Miss Tourism Bonaire 2021.

Djasabra 13 di Mart 2021 próksimo tur e 4 partisipante nan ta bai ta den un show espektakular i inolvidabel, kaminda un di nan lo bira nos embahadora. E Show lo bai ta via Live Streaming atraves di Nos TV i tambe via e página Facebook di Live 99 FM kuminsando 8:30 di anochi.

Durante di henter nan trayektoria e partisipante nan a bin ta akumulá puntuashon i disiplina. Tur e puntuashon nan aki lo konta durante e anochi final.

Djasabra 6 di mart 2021 lo bai tin anochi importantísimo pa e partisipantenan, kaminda nan lo tin e oportunidat di tene un kombersashon ku hurado. E miembro di hurado lo kombersá individualmente ku kada partisipante riba diferente tópiko ku nan a risibí durante diferente charla i lo duna nan kada unu puntuashon pa entre otro nan konosementu i nan abilidatnan komunikativo. Durante e charlanan ku e partisipantenan a risibí den e periodo di preparashon ku ta tras di lomba, nan a haña tur e hèrmèntnan nesesario pa por enfrentá e kombersashon aki ku tur konfiansa.

E kòmbersashonnan ku hurado lo tuma lugá na Resort Bonaire den un aktividat privá.

For di awor, Storyline Production i TCB ta invitá bo pa sigurá e fecha menshoná pa bo sinta na kas i disfrutá di un tremendo show. Nos ta yama un danki di kurason na un i tur ku a duna un man pa e evento Miss Tourism Bonaire 2021 por kristalisá.

Share This
error: Content is protected !!