Kralendijk – Dr. Marian Luinstra-Passchier ta prekupa mirando oumento di kasonan di hende kontagiá ku CoViD-19. Esaki ta loke el a ekspresá durante un enkuentro ku prensa algun dia pasá.

“Delaster biaha ku mi a papia ku boso, mi tabata preokupá ku e kantidat di hende ku a pega ku e vírùs di corona. Despues di esei mi prekupashonnan a oumentá mas. E simannan ku a pasa, nos tabatin basta kaso di kontagio. A base di e resultadonan ku ta drentando awor, ta parse ku kasonan ta bai sigui oumentá. No ta tur resultado ta aden ainda. Na febrüari nos tabatin na tur kuarentinuebe kaso i 38 hende a rekuperá. Awor nos tin na mart den algun dia 147 kaso aktivo kaba. 

Nos ta mira ku den e grupo di trinta pa trintinuebe aña, tin hopi hende ta pega ku e vírùs. Mayoria hende ta pega ku e vírùs via e hendenan ku nan ta biba den kas kuné, via kolega i amistatnan. Esaki tabata asina na yanüari  tambe. Nos ta ripará ku hopi biaha hende ku keho ta sigui traha tòg. Nan ta bai tèst lat. Tin un oumento tambe den e kantidat di ‘cluster’, esta grupo di kontagio. Entre otro na trabou, den seno di kas i na lugá di dibertí. E fuente di kontagio ta konosí den algun di e kasonan akí, pero esei no ta e kaso tur ora. 

Parse ku e vírùs ta plamando mas fásil. Danki Dios ku tin ainda tiki kaso di hende ku mester drenta hòspital. Nos sa tambe ku den práktika por lo general ta despues di par di siman di kontagio, tin hende ta drenta hòspital. Loke sí nos ta wak kaba, ta ku preshon riba sektor di kuido ta oumentando. Esaki komo ku trahadó den kuido ta tèst positivo i otro trahadó ta den karentena,”Dr. Marian Luinstra-Passchier a bisa.

Share This
error: Content is protected !!