KRALENDIJK – Komishon NUKEB, konsistiendo di Sr James Finies di NKBB, Sra Davika Bissessar presidente di Bonaire Human Rights,, Sr Aljano Emerenciana lider di Partido Un Union Pa Pueblo, Sra Suzy Thodé di Union Revolushonario Boneriano i Sr Robby Beukenboom lider di Partido Frente Sosial Progresivo i Sr Sedney Marten komo suidadano, a tene rueda di prensa pa ofisialisashon di nan ofisina ku hisamentu di bandera di e diferente partidonan na e ofisina permanente di e Komishon Ehekutivo ku ta enkargá ku pone Boneiru riba e lista di Nashonnan Uní, pa un mihó Boneiru. Esaki ta situá na Kaya Libertador Simon Bolivar 26, kompartiendo ofisina ku NKBB i Bonaire Human Rights Organizatrion. Sra Davika Bissessar presidente di Bonaire Human Rights a habri e evento i a splika ku NUKEB lo duna aktualisashon riba e proseso di relisting, kon leu esaki ta i kiko ta e ophetivonan, plannan i akshonnan pa e aña aki. Sr Wagner Beaumont a presentá e resúmen kompriso di e resultado di e evaluashon den ki grado Boneiru tin gobernashon-propio segun normanan internashonalmente rekonosé. E evaluashon ku a konsentrá riba tres temanan: Derecho di Outodeterminashon, Aplikabilidat di Leinan, i Igualdat di Status i Derechonan di e Suidadanonan a husga nos situashon riba e temanan aki na e nivel di mas abou, promedio di 1 riba un skala te ku 4. 

Aki un pasashi for di e resúmen…. For di e perspektiva di igualdat ekonómiko, e evaluashon a señalá ku a wanta e benefisionan sosial den e parti “karibense di Reino (Boneiru, Sint Eustatius i Saba)” abou. E stándarnan di apoyo di mas abou a bini na Boneiru, na e mes momentu ku desafionan ekonómiko kresiente, manera: défisitnan komersial haltu, disminushon di e Produkto Interno Bruto, oumento konsiderabel den preisnan di vivienda, kresementu salarial insufisiente, oumento di preisnan i otro faktornan. A hasi menshon di midimentu ku dos midí (lei di trèktu: hanchu pa bo, smal pa mi), ku un kosto di bida signifikativamente mas haltu riba e islanan, ku na Hulanda, pero ku e islanan risibiendo ménos benefisio.

Sra Suzy Thodé di URB ku ta parti di e sup-komishon pa workshop i informashon a trese dilanti ku NUKEB lo bai eduká i informá e pueblo Boneriano tokante re-listing i derechonan pa medio di workshopnan. Esaki lo ta pa lidernan i tambe lo sigui despues ku seshonnan di informashon den barionan, pa gruponan i tambe organisashonnan. Ta hopi importante pa nos ta bon informá pa sa unda nos ta bai.  

Sr Aljano Emerenciana di UUPP di e sup-komishon pa envolví hóbennan a splika ku un pueblo bon informá por husga i e lo ta aktivo i lo konsentrá primeramente pa aserká hóbennan. Mas aleu Sr Emerenciana a bisa ku lo inisiá un kampaña agresivo, den medionan di komunikashon i tambe ku steker riba outo, ku e lema: “Ami Si ke ta riba lista di Nashonnan Uní”.

Sr Robby Beukenboom di FSP ku ta forma parti di e sup-komishon Relashonnan Públiko a presentá e promé posishon públiko di NUKEB. NUKEB ta kondená e nombrashonan di Hulandes-Oropeonan den posishonnan di institushonnan gubernamental i semi-gubernamental. Ehèmpel ku sr Beukenboom a duna ta ku na Bonaire Internashonal Airport kaminda a hulandisá henter e hunta di komisario i tambe a bai mas leu pa nombra Hulandes-Oropeo tambe den posishonnan di direktor i maneho. Meskos ta e kaso por ehèmpel na e departamentu di finansa di Boneiru kaminda a kita un lokal komo hefe i nombra un Hulandes-Oropeo. Finalmente esun mas resien, ta manda nos bèk den tempu, ta esun ku despues di mas ku sesenta (60) aña pasa tabata tin e último Hulandes-Oropeo komo sekretario di teritorio di Bonaire awor por mira kon ta nombra un Hulandes-Oropeo Sra Wendy Pelk for di Alkmaar. E pregunta ta ku no tin niun Boneriano o Antiano ku e nivel ei? O ku no ta ironia pa tur aña gobernantenan ta para na airport ta bisa studiantenan ku ta bai afó, pa bai studia i bin bek bin yuda nos Boneiru, ku esaki ta hipokresia ,i dikon koalishon i oposishon i tur sobra ta parse ta kontentu ku e nombrashonnan aki? Riba e lista di Nashonnan Uní, e meta prinsipal ta netamente pa promové i yega na propio-gobernashon esei ta nifiká ku e posishonnan aki lo wòrdu yena bèk ku nos propio yunan di tera, nos hendenan pa sigurá esei. Pesei nos ke ta riba e lista pa nos mes propio hendenan goberná nos isla.

James Finies di NKBB na final a splika ku awor ku nos tin e resultado di e investigashon ku a keda kla fin di aña pasa, awor nos a drenta e último fase, i ku e ophetivo ta pa Bonaire wòrdu pone riba e lista den e próksimo añanan, pa mas tardá 2025. Riba e lista ta duna un garantia na pueblo di Bonaire ku Nashonnan Uní lo ta ofisialmente i direktamente envolví pa yuda i asistí Bonaire den e relashon ku Hulanda, kaminda Hulanda lo tin ku raportá, duna kuenta, tur aña na Nashonnan Uni kon nan ta kumpliendo ku nan responsabilidat konforme artíkulo 73 i derechonan humano i lei internashonal pa ku desaroyo i bienestar di e pueblo Boneriano.

Share This
error: Content is protected !!