KRALENDIJK – Gezaghèber Edison Rijna awe a deklará ku entrante djaweps awor 18 di mart, e nivel di risiko seis ta drenta na vigor, e asina yama ‘Lockdown’ ku ta dura te djabièrnè 2 di aprel. Esaki debí na e kantidat di kaso nobo último simannan i awe mas ku 60 kaso di Coronavírùs. Ta di lamentá ku te ainda nos no ta mirando un bahada di e kantidat di kasonan aktivo, siendo ku e medidanan pisá ta na vigor 12 dia kaba. Esaki ta pone ku nos mester bai ku mas medida, esaki pa 2 siman.

“Boso ta kòrda ku semper mi a bisa ku si situashon no drecha, lo mi no duda pa tuma medida drástiko. Mi ke pa un i tur komprondé gravedat di e situashon ku nos ta aden awor. Siman pasá  djaweps mi a bisa ku nos lo a keda den fase 5 pasobra nos tabata spera di mira efekto positivo di e medidanan ainda.

E situashon aktual ta eksigí medida drástiko. E ta eksigí tambe pa kada un di nos kumpli, mi ta ripití kumpli ku e reglanan.  

Banda di e e medidanan ku ta konta pa nivel di riesgo 6, ta introdusí un toke de keda di 21:00 di anochi te 04:00 di mardugá. Durante e toke de keda ta prohibí pa bo ta riba kaya. Ta solamente hende ku mester ta riba kaya pa trabou, òf ku tin pèrmit, por ta riba kaya di 21:00 or di anochi pa 4 or di mardugá. Si un hende mester ta na Huisartenpost òf mester bai hòspital pa kuido, e tin mag di ta riba kaya. Polis, Direktorado di Supervishon i Mantenshon huntu ku KMar ta kontrolá ku man duru si hende ta tene nan mes na e toke de keda.

Banda di e medidanan ku ta konta pa nivel 6, ta bini tambe ku lei seku. Ta prohibí pa bende alkohòl na snèk i bar/restorant. Ta prohibí tambe pa bebe alkohòl riba kaya òf den espasio públiko durante dia i anochi.

Ta pèrmití establesementu di hóreka pa hasi entrega di kuminda. Por hasi esaki te 20:00 or. Hende por pasa buska kuminda,  pero no tin mag di para den rei pa take out. Personal di establesementu di hóreka mester entregá e kuminda na outo òf den vehíkulo. Ora un hende pasa buska kuminda, e mester keda sinta den outo. Por buska kuminda estilo ‘take out’ te 8or di anochi. Konforme medida di nivel di riesgo 6, restorant i bar di hotèl por keda habrí pero solamente pa wéspet di hotèl.

Tienda esensial manera supermerkado por keda habrí, ta permití un hende so di kada kas di famia pa drenta.

Tur tienda no esensial mester keda será.

Tur alumno ta sigui haña enseñansa pero di distansia ke men di no na skol. Nan ta haña lès digital. Skol ta keda será i ta habri bèk 12 di aprel 2021, esta despues di vakashon di pasku di resurekshon.

Akohida di mucha tambe ta será.

Mirando nos situashon, mi ta urgi tur misa, kèrki, iglesia i moskei pa por fabor keda será te ora situashon drecha atrobe. Ta rekomendá pa tene misa, sirbishi òf orashon digital.

Por praktiká deporte individual pero pafó, no paden!

Pa asina leu ta posibel trahadónan mester keda traha na kas. Un súplika ta bai na tur doño di negoshi i mènedjer. Por fabor organisá un chekeo di salú pa personal promé ku nan kuminsá traha. Tur trahadó ku tin keho mester bai kas i traha sita pa tèst. Esaki ta na interes di un i tur.

Manera ta konosí e tipo ingles di e vírùs di corona ta na Boneiru. I e ta plamando i pegando hende lihé na nos isla. E úniko manera pa nos para esaki ta, pa tuma medida mas pisá i kumpli ku nan. Nos ta mira ku te ainda tin hopi famia òf hende ta bishitá otro, te asta bishitá hende malu. Mi ke enfatisá ku esei no ta posibel durante lockdown.

Mi ta konsiente ku e medidanan nobo tin impakto grandi den nos forma di biba. Ku hende por sinti nan mes inkómodo òf asta infelis pasobra nan no por move libramente mas awor ku ta bai tin toke di keda i lei seku. Ta importante pa nos sigui hasi ehersisio físiko den e dianan ku ta na kaminda. Pa kome bon i biba salú. I wak pa nos drumi na tempu i sosegá sufisiente. Mi ta hasi un yamada na un i tur pa nos tira bista riba otro den e tempunan akí. Si bo ripará ku e situashon ta hasi bo deprimí, buska ayudo. Papia ku bo hendenan. Tuma kontakto ku bo dòkter di kas i laga e konsehá bo kiko bo por hasi.

Importante pa tira bista riba un otro i si ta nesesario duna un man. Si bo mester di yudansa akudí pa esaki. Tur hende kuida i sigui kumpli ku e medidanan. Bakunashon ta kontinuá durante temporada di ‘Lockdown’. Aeropuerto ta keda habrí. A tuma 1 dia promé ku drenta ‘Lockdown’, asina duna chèns pa hende por atendé  i regla nan asuntunan promé ku drenta e temporada.  

Mi ta hasi un yamada urgente pa tur hende kuida. Kuida i sigui kuida. Kumpli i sigui kumpli ku e medidanan. Nos tin chèns pa kambia e situashon na nos fabor. Ta dependé di abo, ami di nos tur si nos ta logra. Nos por. Basta nos ke.

HOSIPITAL 

E situashon den hòspital ta bou di kòntròl i den pasado tabata manda hende Kòrsou pa tratamentu mas avansá relashoná ku CoViD-19, sinembargo awor e tratamentu menshoná por tuma lugá na Boneiru mes. E motibu ku e vírùs ta plama rápido aktualmente ta debí ku e tipo di vírùs (Britániko) ta plama mas rápido kompará ku loke tabata e kaso algun siman pasá, ku e otro tipo di vírùs. Ta importante pa bakuná, pasobra e hende ku bakuná no ta bira hopi malu i no por kontaminá un otro persona. Mas importante ta tene distansia i bisti tapa boka! Ta dependé di nos mes ku e situashon ta mehorá i ta mas kontrolá”, gezaghèber Rijna a bisa. 

Share This
error: Content is protected !!