KRALENDIJK – Piskabon a risibí sosten finansiero di direktorado di Komunidat i Kuido ‘Directie Samenleving en Zorg’, pa yuda un piskadó ku su boto a keda totalmente destruí. Esaki ta loke presidente di Piskabon Ernest De lanoy, a bisa den un karta pa prensa.  

“E suseso a sosodé aña pasá durante e mal tempu ku a pasa riba Bonaire. 

Ta trata di e piskadó Johannes Zimmerman, bon konosí pa Buwan, kende a pèrdè tur kos. Boto, motor i materialnan di piska. Buwan su fishi ta piskadó, loke e ta hasiendo ya pa hopi dékada. Su bida semper a dependé di piskamentu. Pa e por rekuperá tur loke el a pèrdè i kontinuá ku bida di piskamentu, lo tuma hopi  tempu i esfuerso, pasobra e no tabatin un seguro. Defakto ningun piskadó na Bonaire no tin un seguro di bida òf pa kubri gastu di nan boto òf pertenensia ku sufri daño. Piskabon a hasi un petishon pa ayudo finansiero na direktorado di Komunidat i Kuido. E diputado konserní, no a hesita i a pidi tur informashon nesesario i alabes pone algun kriteria, si entre otro e piskadó ta di ofishi piskadó i inskribí komo miembro di Piskabon.  

Piskabon a manda tur rekisito nesesario pa e departamentu di ‘Samenleving en zorg’ i e petishon a keda honrá.  

Piskabon i Buwan ta masha agradesido na diputado Nina den Heyer, i e hefe di departamentu di ‘Samenleving en Zorg’, Ingrid Sealy. Nan esfuerso i sentido di kompashon humano a hasi esaki posibel. Di e manera aki, awor e piskadó Johannes Zimmerman, bon konosí pa Buwan por subi laman atrobe pa buska su pan di kada dia”, De lanoy, presidente di Piskabon a bisa.

Share This
error: Content is protected !!