KRALENDIJK – Debí na e oumento drástiko di kasonan di hende infektá ku e CoViD-19 na Boneiru, el a pèrkurá pa un preshon enorme den kuido riba e isla. No mester bisa mashá, debi ku tur hende por a tuma nota di e situashon aktual ku ta di atenshon. Resientemente a sali un publikashon di Ministerio di Salubridat, bienestar i Deporte (VWS) aya na Hulanda. Den e publikashon VWS ta buskando diferente profeshonal riba tereno médiko, enfermeronan spesialisá, pa duna un man rápido na Boneiru. Tin mester di hende pa traha sigur pa 3 luna. Ta trata di buska profeshonal den eksterior i mirando e nesesidat urgente, VWS ta ofresé pasashi, kas, outo i salario na nivel di e kontrato laboral vigente na Hulanda. Ta bai un apelashon pa esnan di ‘ZZP-nan’, personanan konosí serka nos komo esnan ku tin un EZ (eenmanzaak) den e ramo di kuido, pa nan tambe hasi uzo di e posibilidat pa un tarifa atraktivo. Esnan ku ta interesá mester ta disponibel dirèkt pa traha pa un durashon di 1 pa 3 luna. VWS ta buskando e siguiente spesialistanan: enfermero di kuido intensivo, enfermero di kuido urgente, enfermero di ambulans, enfermero di rekuperashon, enfermeronan di kuido kardial, enfermeronan di ‘High Care i Medium Care’ i kolaboradónan di anestesia. Personanan interesá por manda un email pa: wervingcaribbean@tmi.nl òf info@healthz.eu

Share This
error: Content is protected !!