KRALENDIJK – Djasabra 20 di mart den oranan di atardi a drenta notifikashon na warda di polis ku tin un grupo di hende na Te Amo Bich riba Kaya Internashonal pabou di aeropuerto ku no tabata tene nan mes na e reglanan di e ordenansa di emergensia. Mesora a dirigí diferente patruya pa e sitio entre otro di KPCN i KMar. Na nan yegada enberdat a bin topa ku un grupo di hende na e bich menshoná ku tabata konsumiendo alkohòl i tabata hopi riba otro sin ta tene kuenta ku e medidanan aktual. Mesora a bai ofer na papia seriamente ku e grupo di hende spesífiko, a konfiská alkohòl i a duna algun persona ku no tabata kumpli ku e ordenansa di emergensia un prosès ferbal. Despues di esaki hopi hende a bandoná e bich.

Polis i departamentu di Supervishon i Mantenshon di Lei di Entidat Públiko no por kontrolá tur kaminda pareu, pesei kualkier persona ku ke mèldu un sitio(nan) kaminda tin aglomerashon di hende, por hasi esaki na polis/KPCN via 717-8000 òf e liña di tep anónimo 717-7251. Si ta trata di un negoshi ku a kibra ku regla, durante ora di ofesina mester yama Direktorado Supervishon i Mantenshon di Lei di OLB (Directie Toezicht en Handhaving T&H) via 715-5300 i si ta trata un kaso di emergensia i tambe despues di ora di ofesina por yama 796-4850. Por manda emeil tambe na bisami_t&h@bonairegov.com

Share This
error: Content is protected !!