KRALENDIJK – Christopher Frans, Sekretario di gabinete di gezaghèber, den un entrevista na Radio Live 99.9 FM, a papia di e lei seku limitativo ku ta na vigor aktualmente. “Tin un lei seku limitativo aktualmente na vigor. No ta esun general manera nos konosé momentu di elekshon. E lei seku aktual ta enserá ku niun establesementu ku ta bende kuminda i bibida no por bende alkohòl, tampoko ofresé alkohòl. Solamente por kumpra alkohòl den supermarkado. Por bebe alkohòl solamente na kas, niun kaminda riba kaya, tampoko kantu di laman òf na kunuku. Solamente negoshinan esensial por ta habrí, entre otro supermarkado, botika, pòmp di gasolin i un lugá ku ta bende material pa konstrukshon. Lugá ku ta bende solamente alkohòl no por habri pa bende nan produkto. ‘Lockdown’ general ta un posibilidat, mirando e situashon aktual. Sinembargo esei ta konseho di EBT ku mester presenté na gezaghèber e proposishon i e ta tuma e desishon final. E mensahe final ku mi tin pa pueblo; nos ta den un situashon di krísis. Tin hopi kaso positivo di Coronavírùs, apesar ku hopi hende a kura. E kantidat di hende infektá ku e vírùs ta haltu, pues e situashon ta di atenshon. Nos mester sigui kuida i ta importante pa hendenan bai bakuná mas pronto posibel”, Christopher Frans a bisa.

Share This
error: Content is protected !!