KRALENDIJK – KPCN i e atministradó di kuerpo (Minister di Hustisia i Seguridat) a kumpli ku mayoria di e rekomendashonnan for di e kuater rapòrtnan di inspekshon anterior di Konseho pa Aplikashon di Lei. Esaki e Konseho pa aplikashon di lei ta konkluí den su investigashon ‘Kumplimentu ku rekomendashonnan KPCN’.

Den último dies aña, den diferente rapòrt e Konseho pa Aplikashon di Lei a duna rekomendashonnan riba tereno di Korps Politie Caribisch Nederland (KPCN). Na 2020 e Konseho a investigá kon polis a kumpli ku e rekomendashonnan for di e kuater rapòrtnan. Tabata trata di rapòrtnan riba tereno di atende keho, sala di kòntròl (meldkamer), yudansa na víktima i atenshon básiko polisial. E Konseho ta positivo tokante e manera ku KPCN a kumpli ku e rekomendashonnan i tokante e manera ku e kuerpo a desaroyá su mes. Ta atribuí e mérito aki na e kuerpo den su totalidat konhuntamente ku e atministradó di kuerpo na Den Haag.

Den su investigashon e Konseho a wak enfátikamente e manera riba kua ta duna guia i ken ta duna guia riba kumplimentu ku e rekomendashonnan. Den práktika ta mustra ku guia ta un faktor importante pa realisashon di e rekomendashonnan. Awor e Konseho ta duna Minister di Hustisia i Seguridat hulandes dies rekomendashon nobo. E minister a manda e rapòrt di e Konseho huntu ku su reakshon riba esaki pa Parlamentu Hulandes.

Dos rekomendashon ta bai tokante mehorashon di guia general di parti di e atministradó di kuerpo na Den Haag. Esta eksplorá un posibel ròl di polis nashonal na ehekushon di maneho di KPCN i organisashon di un proseso pa monitòr kumplimentu ku e rekomendashonnan. E minister a indiká den su reakshon ku e ta tuma e rekomendashonnan aki. Di awor en adelante un bes pa kuartal ta pone riba agènda den e konsulta entre atministradó di kuerpo i KPCN, kumplimentu ku rekomendashonnan for di rapòrtnan di e Konseho i otro temanan.

Na 2021 e atministradó di kuerpo lo eksplorá tambe huntu ku KPCN e deseo i posibilidat di un ròl di polis nashonal den ehekushon di maneho di e kuerpo. Un otro rekomendashon ta bai tokante mehorashon di guia spesífiko riba e proyekto di sala di kòntròl (meldkamer). E minister ta tuma esaki tambe i ta indiká ku entre otro, aporte di un lider di proyekto nobo a resultá den aselerashon konsiderabel di e proyekto.

Entretantu e minister a kumpli ku un rekomendashon enkuanto okupashon den e departamentu di VVC (veel voorkomende criminaliteit / kriminalidat frekuente) den e plan di organisashon nobo di KPCN. E rekomendashonnan tokante Yudansa na víktima tin relashon riba restu di outomatisashon denter di e sistema di ActPol pa loke ta trata e registrashon i fitbèk na víktimanan/denunsiantenan. E minister ta tuma e rekomendashonnan aki tambe. Gerensia di kuerpo lo sigui implementá esaki den kooperashon ku Stichting ICT Beheer.

E rapòrt di inspekshon di e Konseho i reakshon kompleto di minister riba esaki ta públiko. Ambos ta riba e wèpsait di e Konseho: www.raadrechtshandhaving.com

Share This
error: Content is protected !!