Kralendijk – Ya a pasa un aña ku nos aki na Boneiru, meskos ku henter mundu, ta bibando ku e viro di Covid-19, i nos ta konsiente ku lo bo no ke tende otro storia tokante di Covid-19. Pero tòg. Laga nos para ketu un ratu i realisá ku e pandemia aki ta representá e momentu mas krítiko den e historia hóben di Boneiru. Historia lo konta nos futuro generashon, kon nos a lucha, kon nos a sufri i mas importante ainda, kon nos komo hende i komo un pueblo, a logra dominá e viro di Covid-19. Imaginábo e forsa interno, e abilidat pa perseverá i e konfiansa ku nos lo duna na nos futuro generashon, si nos para huntu i kuida otro, pa nos logra e viktoria.

Esaki ta nifiká ku pa nos empoderá nos futuro generashon, pa nan sigui kana ku konfiansa pasobra nan antepasadonan a logra kombatí i dominá un viro ku e okashoná desaster den hinter mundu, nos mester aktua awor. Nos ta yegando final di e trayekto, pero meskos ku tur kos; ‘e último pasonan ta esnan di mas difísil, pero tambe mas nesesario’.

Awor a yega e momentu pa di bèrdat nos demostrá ku nos ta e real kuidadó di nos ruman. Bira kara den pensamentu i pensa riba bienestar di bo ruman. E akto aki, lo yuda nos fortifiká nos determinashon di mantené nos na tur reglanan stipulá, pa e viktoria yega mas rápido posibel.

E desishon ku realmente ta demostrá ku nos ta kuidadó di nos ruman, ta e desishon ku hopi di nos ya a tuma i ku hopi di nos ainda tin nos dilanti. Ta trata di e desishon pa Bakuná. Na nos pareser, medianan sosial, a difikultá e desishon final riba toma òf no di e Bakuna. Di tur parti di mundu i na tur momento di dia, hendenan ku tin otro pensamentu basá riba otro teoria ta manda mensahenan ku a yega direkto riba bo telefon. E mensahe nan aki sinembargo ta plantia un problema sin nunka duna un solushon.

Pa e motibu aki, nos komo partido polítiko responsabel i ku ta konsiente ku bakunashon ta É salida di e pandemia aki, ta tuma e posishon, di urgí tur hende pa registrá i bakuná mas rápido posibel. Tuma e bakuna pasobra bo ta e real kuidadó di bo ruman, tuma e bakuna pa protehá bo mes i bo famia, tuma e bakuna pasobra bo ke empoderá nos futuro generashon i finalmente tuma e bakuna pa Boneiru por sigui kana dilanti.

Historia lo konta ken nos tabata, historia lo konta kon nos a uni i kuida, historia lo konta kon un pueblo chikitu pero ku fe den Dios i konsiderashon pa otro, a logra dominá covid-19.

Laga nos hasi nos parti awe pa mayan historia konta nos kuenta.

Share This
error: Content is protected !!