KRALENDIJK – Ayera djarason 14 di aprel rumornan a kuminsá sirkulá ku lo tin skarsedat di gasolin i gasòil na Boneiru. Esaki debí na un trabou interno ku no a kana segun prosedura na momentu ku tabata deskargá kombustibel for di barku pa e tankinan na e planta di Curoil. Algu a bai robes i a meks gasolin i gasòil huntu den un tanki. Trabou spesial di pòmp a kuminsá mesora na e tanki di almasenahe na e depósito di fuel na Hato. Radio Live 99.9 FM a haña un kantidat di yamada ku e pregunta tokante skarsedat di kombustibel. Esaki a okashoná fila di outo na pòmpnan di gasolin ayera atardi. Mesora nos a drenta den kontakto ku Curoil pa verifiká e informashon ku ta sirkulá. E bosero di Curoil, Sabine Curiel a informá na e momentu ei ku e rumor ku ta sirkulá, no ta bèrdat i ku tin sufisiente produkto pa e komunidat di Boneiru.

Notisia Live 99.9 FM a drenta tambe den kontakto ku Jursi Marshall di Curoil Boneiru i el a konfirmá ku a surgi un problema interno den e proseso di deskargá kombustibel. Pero entretantu a solushoná e problema. “Djaweps tin un barku ku kombustibel yegando Boneiru pa deskargá produkto, pa asina nos por suministrá komunidat i nos klientenan ku kombustibel manera ta e kustumber ku produkto di kalidat. Semper nos a sòru pa garantisá suministro di produkto na Boneiru sin interupshon. Contour Global tambe nos ta suministrá ku kombustibel for di aprel aña pasá despues ku a stòp operashon di Bopec. Mirando e responsabilidat grandi aki nos a drecha un tanki mas aserka. Semper Curoil a sòru pa Boneiru tin un kantidat di fuel, pa asina garantisá e suministro riba e isla i pa esaki tin sufisiente tanki. Den e próksimo oranan, trabounan lo sigui pa deskargá un barku ku tin mará i pa sigui suministrá klientenan ku kombustibel. Komunidat di Boneiru i nos klientenan no mester drenta pániko paso e situashon ta bou di kòntròl. Nos tin un barku mas ku ta bini djaweps i esei ta gasolin èkstra pa asina sòru pa tur pòmp di gasolin tin sufisiente produkto. Curoil ta hasiendo su máksimo esfuerso i ta garantisá ku no tin problema ku suministro di gasolin tampoko gasòil na Boneiru”, Jursi Marshall a bisa. Pues ku yegada di e barku ku kombustibel, ta indiká ku rumornan ku tabata sirkulá tokante skarsedat di produkto no ta kuadra.

Potrèt ta ilustrá awe djaweps mainta na momentu ku e barku tabata yegando Boneiru ku kombustibel èkstra pa deskargá.

Share This
error: Content is protected !!