KRALENDIJK – Awe djabièrnè mainta por a tuma nota di un di e ‘crashtendernan’ di Kuerpo di Bombero Hulanda Karibense (BKCN) riba kareteranan di Boneiru rumbo pa e depósito di fuel di Curoil na Hato. E tipo di vehikulo grandi aki no ta fasil pa mira riba kareteranan di Boneiru. Ta hasi uzo di e ‘crashtendernan’ na Boneiru solamente na aeropuerto ku e meta pa por aktua di manera adekuá den kaso di kandela. Sinembargo, e trabounan ku mester tuma lugá na Curoil ta trata di aktividatnan eksepshonal. Ta bai usa e ‘crashtender’ di manera preventivo na Curoil, durante di trabou spesial di pòmp na e tanki di almasenahe. E fasilidatnan di seguridat di kandela na e tereno di Curoil ta bon; pero ta usa e ‘crashtender’ di manera preventivo pa por aktua rápido si dado kaso sosodé un insidente.

Den kombersashon ku Curoil i e kontroladonan na Hulanda Oropeo, a palabrá pa para kla ku un di e ‘crashtendernan’. Ora finalisá e trabounan, pa mas o ménos 5’or di atardi e vehíkulo spesial lo kore bai kazèrne di brantwer bèk.

Share This
error: Content is protected !!