DAISY COFFIE A MANDA UN KARTA PA GEZAGHEBBER

Written by on

KRALENDIJK – Miembro di Konseho Insular, Daisy Coffie ta urgi gezaghebber den su kalidat di presidente di Konseho Insular, pa sigui ku e reunion di Konseho Insular tokante Bonaire Holding Maatschappij (BHM). Tambe e ta pidi pa gezaghebber duna su punto di bista relashoná ku e investigashon mas detayá di e problemanan na BHM. E reunion di Konseho Insular pa trata e punto akí sinembargo a keda suspendé i no a sigui mas te dia di awe.

INTEGRIDAT

Manera ta konosí ta trata aki di un investigashon relashoná ku proceder i integridat di diputado James Kroon. Aña pasá, segun Coffie, gezaghebber a laga su gabinete hasi un investigashon a base di dokumentonan konkreto, ku e eks direktor di BHM, Ben Oleana, komo dokumento di traspaso, a entregá na momentu ku el a tuma retiru. E gabinete di Gezaghebber mes a hasi e promé investigashon, loke a kondusí na un investigashon mas detayá di e proseder di Kroon den e kaso di kompra di palunan di lus i iluminashon pa stadion di Playa i di Rincon.

Ounke no a sigui investiga sierto asuntunan di BHM mes, a konkluí si ku e diputado no a aktua íntegro den e asuntu di iluminashon. Tambe gezaghebber a manda su konseho pa Konseho Insular tokante kon pa sigui atendé ku e kaso akí.

NV NAN DI GOBIÈRNU

Konseho Insular a pidi gezaghebber pa e mes hasi un investigashon mas profundo di e problemanan ku a siñalá den e kompanianan ku ta kai bou di BHM i den e kompania mes relashoná ku e asuntu di integridat òf proseder ku mester di korekshon agudo.

Esaki ta nesesario segun Coffie, pa motibu ku den kasi tur raportahe di cft ta bin dilanti ku BHM i su kompanianan supsidiario mester duna kuenta i rason. Den komunidat també tin malkontentu tokante e servisio ku e kompanianan aki ta duna miéntras ku nan ta kobra karu pa esaki. Esaki na su turno ta influensiá kosto di bida komo gastunan pa hasi negoshi.

Na nan turno e gastunan haltu akí ku nan no por responsabilisá ta kousa hasi tambe ku ainda no por stipula un mínimo sosial definitivo. E sueldu minimo no ta bale la pena pa traha p’e, miéntras ku e ayudo sosial no ta alkansá pa garantisá un eksistensia humano pa esnan vulnerabel.  

BON GOBERNASHON

Coffie ta urgi Gezaghebber pa sigui mas pronto posibel ku e reunion ku a suspendé. Tambe e ta pidi gezaghebber pa duna su punto di bista tokante un investigashon mas profundo di e problemanan di BHM, manera menshoná den e dokumento di traspaso. Coffie: “Aki tambe nos tin di aber ku e prinsipionan di bon gobernashon, esta transparensia i bon maneho finansiero di kompanianan anónimo di gobiernu.

Share This

Current track

Title

Artist

error: Content is protected !!